Шинэчлэлийн Засгийн газраас “Эдийн засгийг эрчимжүүлэх 100 хоног аян”-ыг эхлүүлээд 20 гаруй хонож буй. Энэхүү аяны хүрээнд хийхээр төлөвлөсөн ажлуудад баялаг бүтээгчид болон бизнес эрхлэгчдийн саналыг тусгахаар Ерөнхий сайдын дэргэд Эдийн засгийн зөвлөл байгуулсан. Энэ зөвлөлөөс Засгийн газрын бодлого шийдвэрт дэвшүүлсэн санал, хийсэн ажлынхаа талаар долоо хоног бүрийн даваа гарагт мэдээлэл хийж байгаа юм.
      Энэ удаа монгол дахь зээлийн үйлчилгээ түүнийг үзүүлэхэд гарч байгаа хүндрэлүүдийг шийдэх гарц, үйл ажиллагааны зардлыг бууруулах арга замыг хайн ажилласан тухайгаа мэдээллээ. Өнгөрсөн долоо хоногт тус зөвлөл Монголбанк, Монголын банкны холбоотой дээрх асуудлын талаар хамтарч ярилцаад, хэд хэдэн тодорхой санал, зөвлөмжийг Засгийн газарт хүргүүлжээ.
         Дээрх зөвлөмжийн дагуу шийдвэрийг Засгийн газраас гарвал бизнесийн үйл ажиллагаа нь удааширсны улмаас зээлийн төлбөрөө төлж чадахгүй байгаа компаниудад дэм тус болно хэмээн найдаж байгаагаа Эдийн засгийн зөвлөлийн нарийн бичгийн дарга Б.Бямбасайхан хэлж байсан юм.