Монголын Барилгын зөвлөх үйлчилгээний “ЭмСи Си Си” корпораци, ШУТИС-ийн Барилгын Инженер, Архитектурын Сургуультай хамтран “ Барилгын зөвлөх үйлчилгээ ба экспертиз хяналт” сэдэвт зөвлөгөөнийг 5 сарын 3-ны өдөр зохион байгуулав.
  Зөвлөгөөнд салбарын зөвлөх, тэргүүлэх инженер, мэргэжилтнүүд, экспертүүд, зураг төсөл, хот байгуулалтын компаниудын удирдлагууд оролцсон юм. Зөвлөх үйлчилгээ, экспертизийн талаар ШУТИС-ийн профессор, доктор Л.Шагдаррагчаа, зөвлөх инженер Л.Төмөр нар, Барилгын бүтээц, ул хөрс суурийн төлөвлөлт, хяналтын талаар ШУТИС-ийн профессор, ШУ-ны доктор, академич Д.Дашжамц, материал бүтээгдэхүүний лабораторийн сорилт, батлагаажуулалтын талаар профессор, доктор Б.Батцагаан нар сонирхолтой илтгэл тавьж хэлэлцүүллээ.

  

  Уг зөвлөгөөний үеэр Нийслэлийн Засаг Даргын Тамгын газар, Монголын Барилгын зөвлөх үйлчилгээний “Эм Си Си” корпораци хамтран ажиллах санамж бичигт гарын үсэг зурав. Мөн ШУТИС-ийн Барилгын Инженер архитектурын сургуультай хамтын ажиллагааны гэрээ байгуулсан. Энэ үйл явдал нь тус зөвлөгөөний гол үр дүн болсон бөгөөд цаашид энэхүү зөвлөгөөнийг жил бүр зохион байгуулахаар шийвэрлэлээ.
  Зөвлөгөөний төгсгөлд “Барилгын зөвлөх үйлчилгээ, зураг төслийн экспертизийн хянан баталгаажуулалтын үйл ажиллагаанд баримтлах үндсэн журам гаргаж мөрдөх, зах зээлийн нийтлэг жишиг хандлагад нийцүүлэн хяналтыг олон төрөл хэлбэрээр хийх, зөвлөх экспертүүдийн үүрэг хариуцлагыг сайжруулах шаардлагатай байна” гэж дүгнэлээ.

Энэхүү зөвлөгөөнд оролцогч БХБЯ, нийслэлийн ЗДТГ-ын удирдлагууд, Барилгын инженерүүдийн холбоо, Барилгачдын холбоо, Монголын барилгын материал үйлдвэрлэгчдийн холбоо, Монголын барилгын зураг, төсөл зохиогчдийн холбооны удирдлагууд энэ чиглэлд эрх зүйн шинэчлэлт хийх, зөвлөх экспертүүдийн мэргэжлийн чадамжийн талаар нэгдсэн бодлоготой ажиллахаар санал нэгдлээ.