Улаанбаатар хотын зүүн бүсийн дулаан хангамж нэмэгдүүлэх зорилгоор БЗД-ийн нутаг дэвсгэрт “Амгалан” дулааны станцыг барьж босгохоор болсон билээ. Дулааны станцын барилгын ажил хэдийнэ эхэлсэн бөгөөд барилга угсралтын ажлыг гүйцэтгэхэд шаардагдах тоног төхөөрөмжийг импортлоход гаалийн болон нэмэгдсэн өртгийн албан татвараас чөлөөлөх тухай хуулийг УИХ-аас саяхан баталсан байна.
    Энэ хуульд уг дулааны станцын барилга угсралтын ажлыг гүйцэтгэхэд шаардагдах тоног төхөөрөмжийн жагсаалтыг “Барааг тодорхойлох, кодлох уялдуулсан систем /БТКУС/”-ийн ангиллын дагуу Засгийн газар батлахаар зохицуулжээ.  Түүнчлэн тус хуулийг 5 дугаар сарын 09-ний өдрөөс 2014 оны 12 дугаар сарын 31-ний өдрийг хүртэлх хугацаанд дагаж мөрдөхийг үүрэг болгосон байна. Ийнхүү “Амгалан” дулааны станцыг барихад шаардагдах тоног төхөөрөмжийг импортын гаалийн татваргүйгээр хилээр нэвтрүүлэхээр боллоо.