Одоо төрөөс хэрэгжүүлж буй 30 хувийн урьдчилгаа төлбөр төлөөд, банкны зээлд хамрагдан орон сууцтай болохоос илүү уян хатан төлбөрийн нөхцөлтэй нэгэн хөтөлбөрийг нийслэлээс хэрэгжүүлэхээр болсон тухай хэдэн сарын өмнөөс ярих болсон. Энэхүү ажлыг гардан хийж байгаа хүн бол нийслэлийн Хот байгуулалт, хөрөнгө оруулалтын асуудал хариуцсан орлогч С.Очирбат. Түүнтэй ажлынх нь талаар хөөрөлдсөнөө хүргэе.
-Сүүлийн үед нийслэлийн орон сууцны корпораци /НОСК/ гэх нэр их дуулдаж, иргэдийг хямд төсөр орон сууцаар хангах өөр нэг хөтөлбөр хэрэгжиж эхлэх тухай яригдаж байна. Ажлыг хариуцаж байгаа хүний хувьд дэлгэрэнгүй ойлголт өгөхгүй юу?
-Нийслэл иргэдээ инженерийн дэд бүтэцтэй, тохилог орон сууцаар хангах зорилт тавиад үүнийгээ 5 чиглэлээр хэрэгжүүлэхээр хөтөлбөр боловсруулсан. Энэ хөтөлбөрийг маань Нийслэлийн иргэдийн төлөөлөгчдийн хурал сая баталлаа. Ингэснээр нийслэлийн иргэдийг орон сууцаар хангах тодорхой бодлого, төлөөлөлтэй явуулах алхам нээгдэж байгаа юм. Орон сууцны асуудлаа шийдэж чадсан улс орнууд яг л манайх шиг байдалд орж байсан юм билээ. Зөвхөн хувийн хэвшлийнхэн зах зээл дээр орон сууц нийлүүлэхэд өндөр үнэтэй байдгаас гадна ихэд удаашралтай учир зайлшгүй төрөөс зохицуулах шаардлагатай болдог бөгөөд төр өөрийн орон сууц хариуцсан байгууллагуудаараа дамжуулан иргэдээ орон сууцжуулсан туршлага олон улсад их байдаг. Иймд нийслэлийн хэмжээнд орон сууц зохицуулалтын бодлого хариуцсан байгууллагатай болохоор шийдэн ажиллаж байгаа нь НОСК юм. Түрүүн нийслэлээс иргэдээ 5 үндсэн чиглэлээр орон сууцжуулах зорилт тавин ажилахаар болсон гэж ярьсандаа. Зөвхөн нэг чиглэл НОСК. Мөн хуучин орон сууцаа хувийн хэвшлийнхэнтэй хамтарч шинэчлэх, түрээсийн орон сууцаар хангах, дэд бүтэцтэй амины орон сууц барих, зэрэг ажлуудыг хийхээр төлөвлөн ажиллаж байна.
-Түрээсийн орон сууц барьж зорилтод бүлгийхэнийг хамруулана гэж байгаа. Сарын төлбөр нь ямар байх бол?
-Олон талын судалгаа хийсний дүнд бид нийслэлд түрээсийн орон сууц барих зайлшгүй шаардлага байна гэж үзсэн. Өөрөөр хэлбэл түрээсийн орон сууцны хэрэгцээ маш их байгаа. Гэтэл тохилог орон сууцны үнэ 300-аас дээш мянган төгрөг байгаа юм. Ийм хэмжээний мөнгө төлөөд амьдарна гэдэг иргэдэд хүндрэлтэй. Айлын хашаанд гэр түрээслээд амьдарч байгаа иргэд ч байна. Иймд байр түрээслэх шаардлагатай иргэдийг тохилог хэр нь хямд төсөр орон сууцаар хангах зорилгоор түрээсийн орон сууцыг нийслэлийн төсвөөр барьж эхлээд байна. Ер нь бол “Нийслэлийн орон сууцны дэд хөтөлбөр” хэрэгжсэнээр иргэд орон сууцны сонголт ихтэй болж байгаа юм. Бэлэн мөнгөтэй нь шууд худалдан авалт хийх, урьдчилгаа төлбөртэй нь үүнийгээ өгөөд банкнаас зээл авах, ажилтай орлоготой бол урьдчилгаагаа бага багаар бүрдүүлээд хэдэн жилийн дараагаас байрандаа орох, бүүр болохгүй бол түрээсийн байранд орох гэх мэтээр сонголтууд юм. Мэдээж гэр хороололруу дэд бүтэц тавигдаад эхлэхээр тохилог амины сууцтай болсон ч нээлттэй болно.
-НОСК орон сууцаа барьж эхлэхэд зөвхөн иргэдээс өгөх мөнгөнөөс гадна хөрөнгө хэрэгтэй болох нь тодорхой. Үүнийг хэрхэн зохицуулах вэ?
-Санхүүжилтийн схем боловсруулахаар манай Санхүү эдийн засаг хариуцсан орлогчоор ахлуусан баг ажиллаж байна. Ер нь бол олон улсын туршлагаас харахад гарааны хөрөнгийг улсын болоод нийслэлийн төсвөөс шийдэж өгсөн байдаг. Энэ жил нийслэлийн төсвөөс 15 тэрбумыг энэ хөтөлбөрт зарцуулахаар тусгаж өгсөн. 15 тэрбум гэдэг их мөнгө ч бас бага мөнгө. Бид хөтөлбөрийн гарааны хөрөнгийг 50 орчим тэрбум байхаар тооцоолж байгаа. Харин иргэдийн хуримтлалыг ямар түвшинд, хэрхэн зохицуулахаа ярилцах хэмжээнд л байна.
            -НОСК-ийн үйл ажиллагаа эхлэхийг хүлээх хүлээлт нийгэмд их байх шиг байна. Хэзээнээс хэрэгжиж эхлэх вэ?
- Хүмүүс асуугаад байна, ажлаа эхлэе гээд уухайлан дайраад нэг амьсгаагаар шийдэгдэх асуудал биш л дээ. Иргэд хүлээж байгааг ойлгож байгаа. Ер нь бол энэ ажлыг хийх нь зүйтэй юу үгүй гэдгийг тодруулах гэж бид өнгөрсөн 5-6 сарын турш маш их судалгаа хийсэн. Нийгмийн бүхий л давхаргынхантай уулзсан. Эмч, багш гээд бүгдээс нь санал асуулга авахад маш их дэмжсэн байгаа. Ийм учраас энэ хөтөлбөрийг хийхээр болсон юм. Гэхдээ одоо юуны түрүүнд НОСК-аа байгуулах хэрэгтэй байна л даа.
            -Яг хэзээ байгуулах вэ?
-Хоёр долоо хоногоос хэтрэхгүй гэж бодож байгаа. Тэр үед илүү дэлгэрэнгүй болно байх бидний ажил.