БЗД-ийн 11-р хорооны нутаг дэвсгэрт байрлах Ургах наран” хороолол баригдсан цагаас багагүй хэл аманд өртсөн. Энэ хорооллын хамгийн гол асуудал бол бохирын систем нь хотын ерөнхий шугам сүлжээнд холбогдоогүйтэй холбоотой. 
        “Ургах наран” хорооллын бохирыг соруулж зөөдөг бөгөөд өнгөрсөн оны өвөл бохирын цооног нь хальж Налайх явах замд хальтаргаа гулгаа үүссэнийг иргэд санаж буй биз ээ. Тус хорооллын бохирыг зөөвөрлөх асуудлыг зөвхөн БЗД-ийн зүгээс зохицуулдаг гэнэ.  Саяхан болсон Нийслэлийн удирдлагын зөвлөлийн хурлаар тус дүүргийн Засаг дарга Д.Пүрэвдаваа “Ургах наран” хорооллын бохирыг цаашид дүүргийн хүч хөрөнгөөр зөөвөрлөхөд хүндрэлтэй байгаа талаар санал тавьсны дагуу Хотын ерөнхий менежер Б.Бадралаар ахлуулсан ажлын хэсэг “Ургах наран” хорооллын бохирын системийг ерөнхий шугам сүлжээнд холбуулахаар болжээ.
         НИТХ-аас  хотын төвлөрлийг багасгах үүднээс 2007 онд “Монгол мөрөөдөл” төслийг баталж, хэсэгчилсэн ерөнхий төлөвлөгөөний дагуу хэрэгжүүлж эхэлсэн байдаг. Төслийг санаачлагч НИТХ-ын төлөөлөгч Г.Ганбаярын санаачилгаар 100.000 айлын орон сууц төслийн хүрээнд “Ургах наран” хорооллыг анх барьж эхэлжээ.  Нийт 120 га газарт уг хотхонг байгуулахаар төлөвлөж, зөвхөн орон сууц барихад 267.4 тэрбум, дэд бүтцийг шийдэхэд  37.7 тэрбум, инженерийн бүтцэд 153.9 тэрбум төгрөг шаардагдах урьдчилсан тооцоо гарч  “Блью Скай Партнерс” ХХК гүйцэтгэгчээр нь ажилласан байдаг. Нийслэлээс газар, дэд бүтцэд дэмжлэг үзүүлж, гүйцэтгэгч компани өөрийн хөрөнгөөр” Ургах наран” хорооллыг барьж өнөөдрийн байдлаар тус хороололд 432 өрхийн 1728 иргэн оршин сууж байна.