Засгийн Бага дунд орлоготой иргэдийг хямд өртөгтэй газраас “орон сууцаар хангах” хөтөлбөрийн хүрээнд ХУД-ийн нутаг дэвсгэрт “Буянт-Ухаа” хороолол босч байгаа билээ. Тус хорооллын эхний ээлж болох “Буянт-Ухаа1” ашиглалтанд орж, саяхан оршин суугчиддаа шалгаруулж дууссан бол 2 дахь ээлжийн барилгыг тун удахгүй барьж эхлэх нь.
        Төрийн орон сууцны корпорацийн захиалгаар 28 га газарт  баригдах “Буянт-Ухаа 2” хорооллын эхний ээлжийн орон сууцны барилгын шав тавих ёслол болов. Шав тавих ёслолд Төрийн орон сууцны корпорацийн Ерөнхий захирал А.Гантулга, Тэргүүн дэд захирал Д.Алтанхуяг, Дэд захирал Д.Оюунжаргал нарын удирдлагууд болон “Үндэсний бүтээн байгуулалтын корпораци ”ХХК-ийн Ерөнхийлөгч  Ц.Эрдэнэбат, “Үндэсний бүтээн байгуулалтын корпораци” ХХК-ийн ТУЗ-ийн дарга Б.Жүгдэр нар болон ТОСК  ҮББК-ийн  инженер техникийн ажилтнууд оролцсон байна.
         “Буянт-Ухаа 2” хороолол нь 9 давхар бүхий 48 ширхэг, 12 давхар бүхий 60 ширхэг орон сууцны барилгаас бүрдэх бөгөөд 240 хүүхдийн 4 цэцэрлэг, 940 хүүхдийн  2 сургуулийг хамтад нь барихаар төлөвлөж байгаа юм.
Түүнчлэн нэгдсэн авто машины 7 давхар гражийг ч барьж ашиглалтанд оруулахаар болжээ.  Тус хорооллын эхний ээлжийн 48 барилгын ерөнхий гүйцэтгэгчээр “Үндэсний бүтээн байгуулалтын корпораци” ХХК шалгаран ажиллахаар болсон байна.