Чингис бондын хөрөнгөөр санхүүжүүлэх боломжтой барилгын болон эрүүл мэндийн салбарын үйлдвэрүүдийн төсөл хөтөлбөрийг ЗГ-ын Бодлогын зөвлөлөөр шийдвэрлэжээ.
Барилгын салбарт  Монголын алт ХХК-ийн хоногт 3000 тонн клинкер, жилд 1 сая тонн цемент үйлдвэрлэх хүчин чадалтай  “Хөх цавын” цементийн үйлдвэрт 87,5 сая ам доллартай тэнцэх төгрөг олгохоор болсон байна.  Дорноговь аймгийн Даланжаргалан сумын нутагт баригдаж буй "Хөх цавын" цементийн үйлдвэрийн төсөвт өртөг 351,6 сая ам доллар бөгөөд энэ оны 11 дүгээр сард ашиглалтанд оруулахын тулд хүсч байсан санхүүжилт 87,5 сая ам долларыг ийнхүү  шийдвэрлэж өгчээ.
          Түүнчлэн Дорноговь аймгийн Өргөн суманд баригдаж байгаа Монполимет ХХК-ийн жилд 1 сая тонн цемент үйлдвэрлэх хүчин чадалтай “Монцемент” төслийг санхүүжүүлэхээр боллоо.  Энэ төслийн төсөвт өртөг нь 284,8 сая ам доллар бөгөөд ирэх оны 11 дүгээр сард ашиглалтанд оруулахаар төлөвлөж байгаа аж.  "Монцемент" төсөлд 65 сая долларын санхүүжилт шаардлагатай байсныг 2 үе шаттайгаар санхүүжүүлэхээр шийдвэрлэсэн байна.  Эхний үе шатанд 35 сая ам доллартай тэнцэх төгрөг, нэгдүгээр үе шатны ажил дууссаны дараа үлдэгдэл 30 сая ам доллартай тэнцэх төгрөгийг олгохоор болжээ.
        Засгийн газрын зүгээс цементийн импортын хамаарлыг арилгахаар бодлогын түвшинд дэмжлэг үзүүлсэн  “Хөтөлийн цемент, шохойн үйлдвэр” жилд 1 сая тонн үйлдвэрлэж эхэлсэн. Харин ирэх оны сүүлчээр  дээрхи 3 үйлдвэр бүрэн хүчин чадлаараа ажиллаж эхэлбэл манай улс жилд 3 сая тонн цемент үйлдвэрлэдэг болох юм.
        Тус бүр нь 1 сая тонн хүчин чадалтай эдгээр том үйлдвэрээс гадна жилд 200 мянган тонн хүртэл цемент үйлдвэрлэх үйлдвэрүүд баригдаж эхэлжээ.Тухайлбал: Дархан-Уул аймаг дахь Эрлийн цементийн үйлдвэр гэхэд хүчин чадлаа 700 мянган тонн-д хүргэхээр техникийн шинэчлэлт хийж байгаа гэнэ. Эдгээр үйлдвэрүүд төлөвлөсөн ёсоороо ашиглалтанд орвол 2016 он гэхэд цементийн импортын хамаарлаас бүрэн гарч,  эх орондоо 4 сая хүртэл тонн цемент үйлдвэрлэдэг болох юм.