Үндэсний номын сан орчин үеийн шийдэл бүхий номын сантай болох тухай хэдхэн хоногийн өмнө бид мэдээлж байсан билээ.
Тэгвэл уг номын сангийн барилгын шав тавих ёслолын ажиллагаа өнөөдөр боллоо. Сүхбаатар дүүргийн 7 хороо буюу Америкийн нэгдсэн улсын элчин сайдын яамны баруун өмнө 0,3 га газрыг шинэ байр барихаар тогтоод бараг 10 шахам жил болж буй тус номын сангийн хамт олон өнөөдрийг оруулаад 2 дахь удаагаа шав тавих ёслол үйлдэж буй нь энэ юм.
Анх 1951 онд анх ашиглалтанд орж байсан Үндэсний номын сангийн өнөөгийн байр тухайн үедээ 500 мянган номын фондтойгоор үйл ажиллагаагаа эхлүүлж байсан бол өдгөө 3 сая гаруй ном хэвлэлтэй болж зайлшгүй өргөтгөн томсгох шаардлагатай болсон байна. Иймд өргөтгөл хийх,  орчин цагийн шаардлагад нийцсэн шинэ байртай болох асуудлаар сүүлийн 10-аад жил хөөцөлдөн барилга  бариулах газар болон компаниа сонгуулж байсан ч хөрөнгийн эх үүсвэр нь шийдэгдээгүй улмаас хойшлогдсон байна. Харин энэ удаа Засгийн газраас Үндэсний номын сангийн шинэ барилга барих асуудлыг идэвхтэй дэмжиж 2014-2016 онд “Үндэсний номын ордны шинэ цогцолбор” 11 давхар барилга барих ажлыг эхлүүлж, хөрөнгийн эх үүсвэрийг баталж өгсөн аж. 12 тэрбум төгрөгөөр босохоор төлөвлөгдөж байгаа уг барилгын зураг төслийг “Эгэл” ХХК хийсэн бол гүйцэтгэгчээр “Акми холдинг” компани шалгарчээ. Өнөөдөр болсон шав тавих ёслолын ажиллагаанд бичгийн их хүмүүс болох Ардын уран зохиолч Ш.Сүрэнжав, Т.Галсан болоод Үндэсний номын сангийн үе үеийн удирдлагууд, ажилчин албан хаагчид хүрэлцэн ирж оролцсон юм. Ёслолд оролцогсод өмнөхийн адил шав тавих ёслол болоод өнгөрөх биш барилга сүндэрлэн босно гэдэгт итгэлтэй байсны адил уншигчид бид ч мөн орчин үеийн номын сангийн жишгийг харуулсан тохилог барилга баригдаж, тогтсон хугацаандаа босно гэдэгт найдвар тавин хүлээж байна.