Барилгын салбарын  чиг үүргийг зарим нэр төрлийг мэргэжлийн төрийн бус байгууллагуудад шилжүүлэх тухай нэлээд эртнээс яригдаж Засгийн газраас саяхан энэ тухай тогтоол гаргасан юм. Энэхүү тогтоолд “Хот байгуулалтын баримт бичиг, барилга байгууламжийн зураг төсөл боловсруулах, барилгын ажил гүйцэтгэх, материалын үйлдвэрлэл, угсралт, засвар үйлчилгээ эрхлэх хуулийн этгээдэд тусгай зөвшөөрөл олгох ажлыг зохион байгуулах чиг үүргийг барилгын салбарын төрийн бус байгууллагаар гүйцэтгэлүүлэх ажлыг Барилга, хот байгуулалтын сайд Ц.Баярсайханд зөвшөөрсүгэй” хэмээсэн байдаг. Мөн энэхүү тогтоолтой зэрэгцэн барилгын салбарынхантай холбоотой нэг тогтоол гаргасан нь “Барилгын зураг төсөлд магадлал хийх, хот байгуулалтын баримт бичигт экспертизийн дүгнэлт гаргах иргэн, хуулийн этгээдийг өрсөлдөөний журмаар сонгон шалгаруулж,  тэдгээрийг зохион байгуулах чиг үүргийг хариуцлага хүлээх чадвар бүхий мэргэжлийн хуулийн этгээдээр гэрээний үндсэн дээр гүйцэтгүүлэх ажлыг тусгайлсан журмаар зохицуулах ажил” юм. Мэдээж эдгээр ажлыг хариуцан хийхийг харьяа яамдын сайд нарт даалгасан байдаг.  2 дах тогтоол гарсантай холбогдуулан Засгийн газрын 2009 оны 204 тогтоолоор баталсан “ Барилга байгууламжийн зураг төсөл боловсруулах, зөвшилцөх, магадлал хийх дүрэм”-ийг хүчингүй болгосон юм.