Хүний амьдралын үндсэн хэрэгцээнд идэж уух, өмсөж зүүх, амьдрах орон байр гэдэг чухал байр суурь эзэлдэг. Цаг үе нийгмээ дагаад хүний амьдран суух орон байрны хэрэгцээ ч өөрчлөгдөж өнөөдөр янз бүр байх болжээ.

Барилга байшингийн загвар хийц ч мөн адил зориулалтаас шалтгаалан хийц бүтээцийн хувьд ч ахиц дэвшил бий болсоор байна. Нялхасыг өлгийдөн авах, өвчтөнг анагаах эмнэлгийн байшин барилга, хүүхэд багачуудын дуу хоолой цангинаж, эрдмийн их аянд хөл тавьдаг ерөнхий боловсролын сургуулиуд, нийгмийн бүхий л салбарын мэргэжлийн сэхээтнүүдийг бэлтгэх их, дээд сургуулийн барилга, соёл урлаг, спортын ордон, та бидний амьдран суух орон сууцны барилга зэрэг эдгээр бүхий л барилгууд зөвхөн барилгачдын нөр их хөдөлмөрийн үр шимээр сүндэрлэн босдог. Хэдийгээр залуухан ч бахархах зүйлтэй, чамлахааргүй олон барилгын ажилд гар бие оролцож, барилгачдыг удирдан зохион байгуулж, амжилттай ажиллаж буй Г.Нармандах гэх барилгын даамал залуугийн ажил, амьдралын талаар хүргэж байна.  

“Асар Өргөө” ХХК-ийн барилгын даамал Г.Нармандах хамт олноо удирдан ажлын шат дамжлага бүхнийг өөрийн биеэр хариуцан ажилладаг. Даамал гэдэг хариуцлагатай ажил учир өглөөнөөс үдшийн бүрий хүртэл ажиллах тохиолдол цөөнгүй.  Хаана, хэдэн давхарт ажлын гүйцэтгэл хэдэн хувьтай, техникийн шаардлагын горимын дагуу явагдаж байгаа эсэх, ажилчдын хөдөлмөр хамгаалалын аюулгүй байдлыг хангасан, тэд хувцас, хамгаалах хэрэгслээ хэрхэн хэрэглэж байгааг хөдөлмөр хамгааллын инженертэй хамтран шалгах, байнгын хяналт тавьж ажилладаг. Мөн барилгын талбай дээр ямар бараа материал татагдан ирж буй зэргийг бүхий л ажлууд энэ хүний хяналтаар дамжина.   

Одоо тэрээр СБД-ийн 8-р хорооны нутаг дэвсгэр дээр хуучнаар Гэмтлийн эмнэлгийн баруун урд талд иргэн  Д.Эрдэнэчимэгийн захиалга, хөрөнгө оруулалттай 110 айлын, дороо үйлчилгээтэй орон сууцны барилга дээр ажиллаж байна. Энэ оны 12 сарын дундуур улсын комисст хүлээлгэж өгөх гэнэ.  

Г.Нармандах тус компанид няраваар ажилд ороод ахлах инженер болтлоо тушаал дэвшин 8 дахь жилдээ ажиллаж байна.  

Түүний өвөө болон аав н.Гансүх нь барилгын салбарт мөн залуу насаа зориулж, эх орныхоо бүтээн байгуулалтанд гар бие оролцож явсан сантехникч мэргэжлийн  хүмүүс байжээ. Аав н.Гансүх нь одоогийн 3, 4 дүгээр хорооллын 7 дугаар конторт сантехникчээр ажилладаг байж. Хүүхэд байхын л аавыгаа даган ажилд нь хамт явдаг байсан нь барилгын салбарын ажлын сайхныг бас  хүнд хэцүүг нь мэдэрэхэд тус болжээ.

Ажилчид ажлын горимын дагуу ажиллаж байгаа эсэх зэргийг барилгын талбай дээр байнга шалгах хэрэгтэй болдог. Даамал өчүүхэн төдий л хариуцлага алдахад барилгын бүх ажил алдагдах тул түүний хариуцсан ажил өндөр хариуцлага шаарддаг.   

Манай орны уур амьсгал эрс, тэс. Зөвхөн дулааны улиралд л барилгын ажил явагддагаас гаднабогино хугацаанд ажлаа амжуулах шаардлага гарч, өдөр, шөнөгүй ажиллах үе олонтаа байдаг.

Барилга дээр ажиллаж буй 100 гаруй барилгачдын эрүүл мэнд, хоол ундны хангамжинд нь ч санаа тавина. Олон хүнтэй ажиллана гэдэг тийм амар зүйл биш. Тэдэнтэй эв зүйгээ олж харилцана гэдэг түүнд харилцааны томоохон хичээл болдог. Зарим нэгийг нь магтаж урамшуулна, заримд нь хатуухан үг хэлнэ, заримд нь зөвлөнө. Энэ бүхний эгзэгийг тааруулна гэдэг бас хэцүү ажил. Маргах үе олонтоо байдаг хэдий ч маргааш нь ажлаа хамтдаа хийгээд л байж байдаг.

Ажлын төлөвлөгөөгөө ярилцаж байгаа нь

  Инженерүүдийн хамт

“Манай барилгачин залуус миний үгийг даадаг, ойлгож авдаг шүү. Миний удирдлаган дор надаас ахимаг насны хэд хэдэн хүмүүс бий. Тэд маань намайг “та” гэж дуудахад эвгүй санагддаг” хэмээсэн.

Г.Нармандах хэлэхдээ “Барилга дээр ажиллаж байгаа бүх хүмүүсийн ажил нэгнээсээ шууд хамааралтай учир хүн бүрийн л ажил дор бүртээ хариуцлагатай ажиллах хэрэгтэй. Бид чинь эх орны бүтээн байгуулалтанд багахан ч гэсэн хувь нэмрээ оруулж дараагийн хойч үедээ хэлэх үгтэй, хийсэн ажилтай байхыг хичээж, нэгэн зорилготой ажиллах учиртай. Манай барилгачид мэргэжлийн ур чадварын хувьд үнэхээр сайн. Даанч зарим нь цалин буусны маргааш ажилдаа ирдэггүй нь үнэний хувьтай. Энэ хандлагыг бүр мөсөн больчих хэрэгтэй байгаа юм. Ер нь барилгын ажил ур чадвар, тэсвэр тэвчээр шаарддаг хэцүү ч гэсэн байнга шинийг бүтээж бий болгодгоос улам урам, зориг ордог шүү.” гэж ярьж байв.

  Түүний эхнэрГ.Мөнхтуяа 12 хүүхэдтэй айлын отгон нь охин. Харин Г.Нармандах өөрөө гурван хүүхэдтэй айлын том хүү. Өдгөө эхнэр, 3 охиныхоо хамт амьдардаг бөгөөд удахгүй бас бүл нэмэхээр гэж байгаа гэнэ.

 

Эхнэр охидуудын хамт
 

Анх барилгын ажил уртасгасан цагаар ажилладаг, зав муутай гэр орондоо үзэгдэх нь ховор болохоор эхнэр нь тийм ч дуртай байгаагүй гэдэг. Харин одоо нөхрийнхөө ажлаар бахархаж, ажил хөдөлмөрөө илүү сайн хийгээсэй хэмээн хүсдэг болжээ.

Магадгүй ар гэр нь ойлгож хичээсний үр дүн биз Г.Нармандахыг компанийх нь зүгээс өнгөрсөн хавар автомашинаар шагнажээ.

Зарим барилгын талбай дээр осол гарч байгааг тэрээр “Миний харж байгаагаар барилга дээр нэлээн хэдэн жил ажиллачихсан нөхдүүд ажилдаа дасаж хэнэггүй, хайнга ханддагаас болж осолд орох нь их байдаг. Барилга дээр шинээр ажиллаж байгаа барилгачид харин ч хөдөлмөр хамгааллыг сайн сахиж ажилладаг. Шинэхэн барилгачин гэхээсээ илүүтэй олон жил барилга дээр ажилласан хүмүүс л осол гаргаад байх шиг санагддаг” хэмээн дүгнэсэн.

Г.Нармандахын одоо ажиллаж байгаа ““Асар Өргөө” барилгын компаниа олон нийтэд таниулах, Монголын шилдэг байгууллага болгохын төлөө сэтгэл гаргаж, шударгаар зүтгэнэ” хэмээн хэлж байгаагаас харахад шийдвэртээ тууштай, зоримог залуу болох нь харагдсан юм.

Хийе, бүтээе гэсэн хүсэл эрмэлзлээр дүүрэн яваа Г.Нармандах шиг олон зуун барилгачин залуусаар манай улсын барилгын салбар өргөжиж, жилээс жилд улам хүчирхэг болно гэдэгт итгэнэ.