Улаанбаатар хотод  баригдаж буй барилгуудын хөдөлмөрийн аюулгүй ажиллагааны талаарх мэдээллийг нийслэлийн Мэргэжлийн хяналтын газрын дарга Л.Эрдэнэчулуун, дэд  дарга П.Бат-Эрдэнэ, нийслэлийн Цагдаагийн газрын онц хүнд гэмт  хэрэгтэй тэмцэх хэлтсийн дарга Х.Буянтүмэн нар өнөөдөр сэтгүүлчдэд өгсөн юм. Түүнчлэн Монгол улсын хэмжээнд сүүлийн жилүүдэд  барилга дээр гарч буй осол гэмтэлийн талаарх дэлгэрэнгүй мэдээллийг ч дуулгасан.

Өнөөдрийн байдлаар Монгол улсын хэмжээнд 470 барилга баригдаж байгаагаас 26 барилга нь ямарч зөвшөөрөлгүй  баригдаж байгааг тогтоосон байна. Энэ оны сүүлийн 9 сарын байдлаар нийт 14 осол гэмтэл гарсанаас ихэнх нь үйлдвэрлэлийн осол эзэлж байна.  Ослын шалтгаан нь компаниудын хөдөлмөрийн аюулгүй ажиллагаа дутмаг, хуучирч муудсан, ашиглалтын хугацаа дууссан техник технологи ашигласан, эвдрэл гэмтэлтэй тоног төхөөрөмж түрээсэлсэн, ажлын гэрээг албан ёсны хууль тогтоомжийн дагуу хийгээгүйгээс болдог байна. Түүнчлэн дээрх хүндрэлүүдээс шалтгаалж албан ёсны эзэмшигч нь тодорхойгүй болох, нуун дарагдуулах гэх мэт хүндрэл бэрхшээлүүд гарч ирдэг.

Нийслэлийн Мэргэжлийн хяналтын газраас дээр дурдсан зөвшөөрөлгүй 26 барилгад бүх шатны торгуулийг тавьсан бөгөөд шаардлагыг нь хүлээж аваагүй барилгуудыг БХБЯ-нд  хандаж эдгээр тусгай зөвшөөрлийн эрхийг нь хасах хүртэл арга хэмжээг авах тухай дурьдлаа.

Цаашид барилгын компаниудын хариуцлагыг өндөржүүлэх, хууль хяналтаа чангатгах үүднээс Цагдаагийн байгууллага, Мэргэжлийн хяналтын газартай хамтран энэ долоо хоногоос нийслэлд баригдаж буй барилгуудад хамтарсан үзлэг шалгалтыг хийхээр боллоо.