Нэгэн том барилгын тухай сураг олныг шуугиулаад байгаа нь “Монголын алт” /МАК/ ХХК-ийн 41 давхар барилга юм. Дэлхийд алдартай “Hyatt” зочид буудлын сүлжээг Монголд оруулж ирэх гэж буй тус компаний хамт олон барилгын гүйцэтгэлийг  БНСУ-ын “Lotte Engineering construction”-иар хийлгэхээр тогтсон тухайгаа мэдэгдсэн байдаг. Мөн “Hyatt”-ын албан ёсны мэдээнд  43 люкс зэрэглэлийн харин  22 апартмент ангилал бүхий нийт 259 өрөө, Sky-bar, 2 ресторан, 23166 кв/м талбай бүхий хурал, уулзалт, бусад арга хэмжээнд зориулагдсан танхимуудтай байх тухай бичсэн байдаг.
Мөн уг зочид буудлын Монгол дахь  2-р салбар  Горхи Тэрэлжийн цогцолбор дахь Мэлхий хадны дэргэд баригдах бөгөөд 2015 онд дуусгахаар төлөвлөжээ.
Энэ тухай хэвлэл мэдээллээр цацагдсанаас хойш шар хэвлэлүүдээр “МАК”-ийн эзэн Б. Нямтайшир энэхүү 41 давхар барилгаа ганц охиндоо зориулан барьж байгаа тухай бичиж, зураг хөрөгтэй нь нийтэлж байлаа. Мөн уг барилгын газрын байршил нэлээд хэл ам дагуулж, анх Чингисийн талбайн хажууд баригдах тухай яригдаж байсан ч өөр газар шаваа тавьсан юм. Төлөвлөгөө ёсоор 5 одтой зочид буудал энэ онд ашиглалтанд орох ч захиалагч байгуулллагаас өнөө хэр ямар нэгэн мэдээлэл дэлгээгүй байна.