Их хотын өнгө үзэмжинд чимэг нэмсэн олон сайхан хороолол, хотхонууд сүндэрлэсээр л… Эдгээрийг олон барилгын компани хийж гүйцэтгэсэн.
Барилгын ажил, барилгын компани гэхээр эрэгтэй хүн удирддаг байх гэсэн таамаглал олон хүнд төрдөг. Энэ нь ч аргагүй юм барилгын салбар нь хүнд үйлдвэрлэлийн салбар бөгөөд манай улсад үйл ажиллагаа явуулж буй барилгын компаниудын удирдлага нь ихэнхдээ эрэгтэй хүн байдагтай холбоотой байх. Тэгвэл энэ удаагийн дугаараар уншигч танд барилгын салбарт өндөр амжилт, нөр их хичээл зүтгэлтэй яваа нэгэн эмэгтэй удирдагчийн тухай хүргэж байна.
Энэ эмэгтэйг Сэдэнхүүгийн Билэгт гэдэг. Албан тушаалын хувьд “Ноёд” констракшн компанийн захирал.  Сүүлийн гурваас дөрвөн жилийн хугацаанд чамлахааргүй бүтээн байгуулалтыг улсдаа оруулж буй төсөл нь  “Сэлэнгэ 888” юм.
Завхан аймгийн Улиастай хотод 13 хүүхэдтэй айлын 11 дэх хүүхэд нь болон мэндэлжээ. Аймгийнхаа ЕБС-ийг онц төгсөөд, ХААИС-д суралцаж 1990 онд малын эмч мэргэжлийг эзэмшсэн нэгэн.
Хийж бүтээх гэсэн залуу халуун насан дээр ирэхэд улс орон зах зээлийн нийгэмд шилжиж байсан үе болохоор төсвийн байгууллагад ажиллана гэдэг амьдрал ахуйд нь хүрэлцээ муутай байсан тул ганзагын наймаанд явж Эрээн, Бээжингээс бараа зөөж хойшоо ОХУ-ын Иркутцик, Москва хотуудад бараагаа борлуулж эхэлжээ.
Гэр бүлийн амьдрал зохиож хоёр сайхан үрийн ээж болсон хэдий ч санаа сэтгэл, үзэл бодол нэгэнт таараагүй учир нөхрөөсөө салжээ. Түүний нуруун дээр хоёр хүүгийнхээ төлөө хичээж зүтгэхээс өөр арга зам үлдээгүй байна. Хар, цагаан ээлжилдэг хорвоод хэцүү бүхнийг сөрж энэ зэрэгт хүрнэ гэдэг өрх толгойлсон эмэгтэй хүний хувьд бие, сэтгэлийн асар их тэсвэр тэвчээр хэрэгтэй. С.Билэгт энэ бүхнийг туулан өнөөг хүрчээ. Одоо түүний хоёр хүү нь хэдийн нас биед хүрч том хүү нь гэр бүлийн амьдрал зохиож, бага хүү нь гадаадад мэргэжил эзэмшиж байгаа аж.   
Багагүй хугацаанд наймаа хийж явсаар улсынхаа хөгжилд хувь нэмэр оруулахаар хөнгөн үйлдвэрийн салбарт хүчин зүтгэж, ноос, ноолууран бүтээгдэхүүн үйлдвэрлэж эхэлсэн байна. Арваад жил энэ бизнесээ эрхэлжээ.
Эргээд харахад бий болгосон бүтээн байгуулалт нь олны нүднээ ил байдаг болохоор аль эртнээс барилгын салбарын хөдөлмөр бүтээлийн сайхныг хүндэтгэн биширч, бас бахархаж явсан энэ эмэгтэй 2011 оноос барилгын салбарт  хүчин зүтгэхээр зориг шулууджээ. Ингээд 2012 оны дөрөвдүгээр сарын 3-ны өдөр “Ноёд констракшн” компанийг худалдаж авчээ.  Энэ салбарт амжилт олно гэдэг олон саад бэрхшээлийг даван туулах учиртайг амьдрал өөрөө энэ эмэгтэйд харуулж, худалдаж авсан компани нь төсөл боловсруулаад ажлын зурагнаас өөр зүйл байгаагүй байна. Олон бэрхшээлүүд ар араасаа гарч ирж компаниа худалдсан хүндээ эргүүлж өгөхийг хүссэн ч түүний санасанаар болоогүй гэдэг. Өнөө цагт юм хийж бүтээе, барьж босгоё гэсэн бүхний араас хэл ам дагуулдаг болж. С.Билэгтийг муу хэлж хэл амаар доромжилсон үйл явдлууд тойроогүй биш дайрчээ. Эхэндээ хэцүүхэн санагдаж байсан ч одоо тэрээр “Үнэн гэдгийг цаг хугацаа өөрөө шалгадаг” гэдгийг өөртөө ч өрөөлд ч хэлж, санаж зорьсондоо хүрэхийн тулд энэ мэт зүйлд санаа сэтгэлд зовоохоо больсон байна.  
Тухайн үед худалдан авсан компани нь улсад татвар төлдөггүй, үйл ажиллагаагаа эхлүүлээгүй байж. Ингээд түүний хувьд ажлынх нь эхлэл тун чухал байсан учраас нийгмийн хариуцлагаа ухамсарлан компаниа худалдаж авсныхаа дараа сараас нь эхлэн улирал бүрт татварын тайлан гаргаад, ажилчидаа нийгмийн даатгалд хамруулж эхэлжээ.  Компани ч хөл дээр нь зогсож чаджээ.
    Одоо түүний удирдан авч яваа компанид үндсэн болон гэрээт ажилтан нийлээд 180 гаруй хүмүүс ажиллаж байна. Нийт ажилчдынх нь 70-80 хувь нь залуучууд ажилладаг болохоор тус компанийхан урам зоригтой ажиллаж, богино хугацаанд чамлахааргүй барилга барьж ашиглалтанд өгчээ. Түүний удирдлаган дор ажиллаж буй залуус С.Билэгтийг ааш зан харилцаа сайтай, ажилчдынхаа ар гэр нийгмийн асуудлыг бага гэлтгүй шийдэж өгч байдаг хэмээн ам сайтай байдаг юм билээ.
Өнөөдрийн нийгэмд дадлага туршлагатай хүмүүсийг ажилд авна гэсэн чиг хандлага давамгайлах болсон нь байгууллагынхаа бааз суурийг бататгах гэсэн хандлага гэдэг нь мэдээж. Харин С.Билэгт захирал энэ чиг хандлагын эсрэг байр суурьтай нэгэн. Тиймдээ ч өөрийн компанийхаа боловсон хүчинг сургуулиа дөнгөж төгссөн шинэхэн дипломтой, барилгын салбарт хүчин зүтгэх туйлын хүсэл эрмэлзэлтэй залуучуудыг сонгон авчээ. Сайн ажиллаж байгаа залуучуудынхаа төлөөллүүдийг орон сууцаар шагнажээ.
Түүнчлэн гадны орны нэг ч ажиллах хүч болон мэргэжилтэн ажлуулдаггүй зэргийг харахад эх оронч гэж цээжээ дэлддэг хүмүүстэй харьцуулахад жинхэнэ эх орчин хүн гэж хэлэхэд буруудахгүй байх.
“Монгол залуус гадны улс орнуудын барилгачдаас дутах зүйл огт байхгүй, гол нь чадвартай, туршлагатай болоход цаг хугацаа л хэрэгтэй” гэсэн бодлыг тээж явдаг байна.
Олон залуустай хамт ажилладаг болоод ч тэр үү залуу сэтгэлгээгээр хандаж, тэдэндээ тусалж дэмжиж ажиллахыг хичээдэг хэмээн хамт олон нь дүгнэдэг юм билээ.
Барилгын салбарт хөл тавиад удаагүй ч салбарын хүнд суртлууд жилээс жилд багасаж, барилгын ажил эхлүүлэх шат дамжлага цөөрч байгаа зэрэгт сэтгэл хангалуун байж, энэ салбар цаашид улам илүү сайн хөгжиж, цэцэглэнэ гэдэгт бат итгэлтэй явдаг хүн.
 Хот газар орон сууц барилга барина гэдэг нийтийн эзэмшлийн газар буусан айл өрхийн газрыг чөлөөлөх, өдрийн цагаар хүнд даацын машиныг хотоор явуулахгүй шөнө цутгалтын ажлаа хийнэ, ойр хавийн оршин суугчдын гомдол байнга ирнэ. Төрийн байгууллагуудын хууль эрхзүйн баримт болоод шийдвэр тогтоолууд нь хоорондоо зөрдөг. Энэ засвараархайчилганд орж хайчлуулагдахгүй хувийн хэвшлийн барилгын компаниуд барилгын ажил хийнэ гэдэг нь хүндхэн.
Ийм нөхцөл дунд бэрхшээлүүдийг даван туулж, барьж босгож барилгадаа оршин суугчдаа авч, тэдний сэтгэл хангалуун байдлыг мэдэрнэ гэдэг цаашид хийж бүтээхих урам авдаг гэж С.Билэгт захирал хэлэв.
   Барилгын салбар хөдөлмөр хамгаалал аюулгүй байдлыг дээд зэргээр сахих учиртай салбар гэдгийг хэдийнээс мэдсэн тэрээр өөрийн компанидаа хөдөлмөр хамгааллын 2 инженертэй. Аваар осолгүй ажиллахын тулд инженерүүдийн зүгээс хэрэгцээ шаардлагатай хөдөлмөр хамгааллын хангамжийг сайн хангаж өгдөг байна.
Дотоод дүрэм журмаа сайн боловсруулаад сахиж биелүүлээд явахад барилгын салбар осол эндэгдэлгүй үйл ажиллагаагаа явуулж болдог гэдгийг л харуулахыг хичээн ажилладаг аж. Тиймдээ ч мэргэжлийн байгууллагаас зарлаж байгаа сургалтуудад инженер техникийн ажилчдаа чиглэл чиглэлээр хамрагдуулдаг.
2012 оны 4 сараас эхлэн 540 айлын орон сууц барих “Сэлэнгэ 888” төслийг эхлүүлжээ. Одоогийн байдлаар 340 гаруй айл орон сууцандаа оржээ.  Дараа дараагийн барилгын ажлууд ч хэдийнэ эхэлчихсэн байгаа юм билээ. Богино хугацаанд чамлахааргүй орон сууцны барилгыг барьж олон айлыг орон сууцтай болгожээ.
Цаашид ч барилгын салбарт төсөл боловсруулж улс эх орондоо томоохон бүтээн байгуулалт хийнэ гэсэн хүсэл мөрөөдлөөр дүүрэн энэ эмэгтэй байгаагаа нуугаагүй юм.
Барилгын салбарт эмэгтэй хүн удирдагч байна гэдэг их нандин, чамин зүйлийг тусгах гэж хичээдэг байна. Орон сууцнуудын нь европ загвартай ч тагтнуудыг алхан хээгээрээ чимж өгсөн нь үндэсний хэв маягийг шингээх гэж хичээсэн нь харагдсан.
Орон сууцныхаа тагтыг алхан хээгээр чимэглэж өгснийг үнэлж тус компанийн хамт олонд үндэсний брэндийн анхдагч эзэн өргөмжлөл хүртээд авчээ.  
Хийж бүтээх гэсэн үйлсэд жижигхэн гэсэн дэвшилттэй зөв санаагаа хэрэгжүүлж өгөхөд бусдад үнэлэгддэг юм байна гэдгийг хэлж байв.
Үйл ажиллагаагаа эхлээд хэдхэн жилийг өнгөрөөж байгаа хэдий ч НДЕГ, татварын газар, Эрчим хүчний найдвартай түнш гэх мэт олон өргөмжлөл, шагналуудыг тус компани хүртжээ.
Өнөөдрийн энэ зэрэгт хүрсэндээ өөрийгөө дөвийлгөж ярихаас илүүтэй хамт олон залуучуудынхаа хөдөлмөрийн үр шимээр энэ компани энэ зэрэгт хүрлээ гэж хэлэв.
 Барьж бүтээх их үйлсэд гар бие оролцон яваа барилгачиддаа монголд улсад барилгын салбар үүсэж хөгсний 88 жилийн ойн баярын мэндийг “Ноёд констракшн” ХХК-ны хамт олны зүгээс манай сэтгүүлээр дамжуулан хүргэсэн юм.