Д. Очирбат: Барилгын мэргэжил эрэлттэй байна
Аливаа улсын хөгжлийг аж үйлдвэргүйгээр, инженерчлэлгүйгээр, техникийн чадварлаг ажилчидгүйгээр төсөөлөхийн аргагүй билээ. Улс орны хөгжлийн үе шатанд төр засгаас барилгын салбарыг хөгжүүлэх, түүнийг үндэсний боловсон хүчнээр бэхжүүлэх талаар авсан олон талт арга хэмжээний нэг нь анх 1954 онд Аж үйлдвэрийн техникумын дэргэд 22 оюутантай Барилгын салбар байгуулж, улмаар 1960 онд 4 салбар 540 оюутантай Барилгын техникум болгон өргөжүүлэн зохион байгуулсан явдал юм. Барилгын политехникийн коллеж нь энэ жил түүхэн 60 жилийн ойтойгоо золгож байна.
Монгол Улсын ирээдүйн хөгжлийг нуруундаа үүрч явах өндөр хариуцлагын эздийг бэлтгэн гаргадаг Барилгын политехникийн коллежийн Дэд захирал Д. Очирбаттай ярилцлаа.
-Шинэ хичээлийн жилийн нээлтээ өчигдөрхөн хийлээ. Энэ жилийн хувьд оюутнууд ямар мэргэжлийг түлхүү сонгон суралцаж байна вэ?
-Хөдөлмөрийн яамны харъяа 2000 гаруй оюутантай манай сургууль энэ жил түүхэн 60 жилийн ойтойгоо золгож байна. Үүнтэй уялдаж 60-н бүтээлч ажил хийхээр төлөвлөснөөс 100 гаруй оюутан хичээлийн байрандаа гадна дотногүй бүрэн засвар хийж дуусаад өчигдөрхөн оюутнууд маань будаг нь ханхалсан, завсар хийсэн шинэхэн байрандаа хичээлийн шинэ жилээ угтлаа. Энэ жил ирэх жилүүдийг бодвол бүтээн байгуулалтын үе ирсэнтэй холбогдуулан барилгын мэргэжлээр суралцах оюутны тоо нэмэгдэж 800 гаруй оюутан элсэн орлоо. Барилгын политехникийн коллеж нь нийт 18-н чиглэлээр элсэлт авсанаас энэ жил барилгын сантехникч, барилгын цахилгаанчин, мужаан, гагнуурчин, засал чимэглэлчин зэрэг мэргэжлийг сонгон суралцах нь илүүтэй байна. Энэ жилийн оюутнуудын сурлагын дүнгийн судалгаанаас харахад 80 хувиас дээш үнэлгээтэй суралцагчид манай сургуулийг сонгон ирж байгаа нь талархууштай юм.
- Барилгын политехникийн коллеж Хөдөлмөрийн яамны харъяа сургууль гэж сонссон. Хэрхэн уялдаа холбоотой ажилладаг вэ?
-Хөдөлмөрийн яамнаас түншлэл, олон нийттэй харилцах алба байгуулсан нь манай оюутнууд суралцаж байх хугацаандаа цалинтай дадлагажих, ажилд зуучлах, багш оюутнаа онол практикаар сургах түншлэл явагдахад холбох гүүр нь болж өгнө. Манай сургуулийг төгссөн оюутнууд мэргэжилдээ дуртай байгаагийн илрэл нь нийт төгсөгчдийн 87 хувь нь ажлын байран дээрээ амжилттай ажиллаж байгаа явдал юм. Барилгын мэргэжлийн эрэлт ихэсч, давхардсан тоогоор 120 гаруй аж ахуйн нэгж байгууллагуудтай хамтарч ажиллаж байна. Манай оюутнуудаас ажлын байрандаа авах гэх мэт хамтын ажиллагаа улам бэхжиж байна. Мөн хөдөлмөр аюулгүй байдлын сургалтанд хамруулж, тухайн байгууллагаас олон үйл ажиллагаанд хамруулж өгдөг.
-Жил ирэх тусам барилгын мэргэжлээр суралцах оюутны тоо ихэсч байгаа нь улс орны бүтээн байгуулалтанд үнэтэй хувь нэмэр оруулах юм. Цаашид барилгын нарийн мэргэжлийн ангиуд шинээр нээгдэхүү?
-Манай орны барилгын салбарт дэвшилтэт технологи, хөдөлмөрийн бүтээмж, чанарын шинэ стандарт, хөдөлмөрийн аюулгүй ажиллагаа, эрүүл ахуйг шаардсан тогтолцоо нэн шаардлагатай байгаа цаг үетэй уялдуулан улс эх орондоо төдийгүй олон улсад хүлээн зөвшөөрөгдсөн мэргэжилтэй ажилтан бэлтгэн гаргах нь бидний эрхэм зорилго билээ. Энэ ч үүднээс Германы хамтын ажиллагааны хүрээнд төслийн 2 гадаад багш ажиллаж байгаа бөгөөд шинээр 2 анги нээгээд байна. Бетоны , сантехникийн гэсэн 2 анги нээгдлээ. Орчин үед технологийн дэвшил асар хурдтай явж байна. Барилгын салбарт гэхэд цаг тутам шинэ шинэ технологи нэвтэрч, тэр хэрээр хугацаа, зардал хэмнэх бололцоо бий болж байна. Иймээс орчин үеийн шинэ технологид цаг алдалгүй суралцах чадвар эзэмших шаардлагатай. Хөдөлмөрийн яамнаас мэргэшлийн стандартыг боловсруулан нэвтрүүлж байгаа нь мэргэшлээрээ олон улсын түвшинд хүрэх боломж олгож байгаад баяртай байна.