Дэлхийн хамгийн аюултай, эрсдэл дагуулсан барилга байгууламжуудын талаарх мэдээллийг сонирхуулахаар бэлтгэлээ.

Дүүжин сүм, Хятад улс
        Хятадын Шаньси мужийн нутагт орших Таван их уулсын нэг, Хенг  уулын 75 метр орчим өндөртэй хадан цохион дээр баригдсан энэхүү Дүүжин сүм Умард Вей улсын үед баригдсан бөгөөд 1400 гаруй жилийн түүхтэй юм. Хятад дахь буддизм, таоизм, күнзийн сургаалийн элементүүдийг шингээсэн цорын ганц сүм хийд болох Дүүжим сүмийн 40 орчим танхимд хүрэл, төмөр, чулуу, шавраар хийсэн буддын 80 гаруй баримал байдаг байна.
 

Такасуги-ан, Япон улс
Такасуги гэдэг нь үгчилбэл маш өндөр дээрх цайны байшин гэсэн утгатай үг бөгөөд Японы Нагано хотод ойролцоох уулнаас нь огтолж авчирсан хоёр туулайн бөөр модны дээр байрладаг аж. Уран барилгачин Тэрунобу Фужиморигийн барьсан, нэг өрөө бүхий энэ байшингийн дотор талыг гөлтгөнөөр бүрж, хулсан шал дэвссэн байна.
 

Пуэрта де Европа, Испани улс
Испаний Мадрид хотноо байрладаг Пуэрта де Европа зочид буудал нь хазгай хоёр ихэр  цамхгаас бүрдэх ба 1989-1996 оны хооронд Америк, Испаний уран барилгын пүүсүүдийн нэгдсэн төсөл хэлбэрээр баригджээ. Тус бүр нь 26 давхартай энэ хоёр барилга 114 метр өндөртэй бөгөөд 15 градусын налуу байрлалтай аж.
 

Метеора сүм, Грек улс
Метеора гэдэг нь Грекээр агаар дээр дүүжлэгдэх гэсэн утгатай үг ажээ. Грек дэх хамгийн том цогцолборуудын нэг, дундад зууны үеийн сүм хийдүүдийн төвлөрөл гэж хэлж болохуйц тус байгууламж  хадан цохионы орой дээр байрладаг. 15-р зууны үед баригдсан 25 хийд бүхий уг сүм рүү очихын тулд 100 жилийн өмнө хүмүүс хадан цохионоос унжуулсан сагс, олс, суран татлага бүхий  дүүжин шатыг ашигладаг байсан бол одоо тусгайлан зассан зам, шат, гүүрээр явж очдог болжээ.
 

Bозоко орон сууцны барилга, Голланд улс
1994-1997 онуудад Голландын нийслэл Амстердам хотноо баригдсан Возоко орон сууцны барилга нь 55 орчим жилийн турш хувийн орон сууц байсаар ирсэн. Эзэмшигч бүрийг хангалттай хэмжээний байгалийн гэрэлтүүлгээр хангах үүднээс байшин тус бүрд 87 айлын байр байхаар анх төлөвлөгдөж байсан ч захиалагчийн хүсэлтээр нэг байшинд 100 айлын сууц байхаар болгож өөрчилснөөс гадна газрыг бүрэн ашиглах зорилгоор үндсэн барилгын нүүрэн талд нэмж барьсан фасадад 13 нэмэлт байрыг барьж өгчээ.
 

Лихтенштейн цайз, Герман улс
Германы Баден-Вюртемберг мужид орших Свабиан Юра  хэмээх уулын хадан цохион дээр байрладаг анхны дундад зууны ордон болох Лихтенштейн цайз нь 1200 оны орчимд баригдсан. 1311 онд болсон дайны үеэр нурж сүйдсэн ч 1840-42 онд Юрайхын гүн Вилгельм өнөөгийн нео-готик стильтэйгээр дахин барьж байгуулжээ.
 

Сутягин байшин, Орос улс
Оросын бизнесмэн Николай Петрович Сутягины 1992 онд эхлүүлж, 15 жилийн турш барьсан энэхүү модон байшин 11-15 давхартай ба энэ нь Орос дахь хамгийн өндөр модон байшинд тооцогддог. 2008 онд байшингийн тал нь галын аюулд өртсөнөөр орон нутгийн удирдлагууд тэрхүү шатсан хэсгийг нураах шийдвэр гаргасан байна. Гэтэл 2012 оны 5-р сарын 6-нд үлдсэн дөрвөн давхар барилгад дахин гал гарснаар барилга бүрмөсөн сүйджээ.
 

Пизагийн цамхаг, Итали улс
Дэлхийн хамгийн алдартай барилгуудын нэг Пизагийн цамхаг нэг тал руугаа хазайсан гэдгээрээ маш онцлог юм. Энэхүү цамхгийн барилгын ажил 1173 онд эхэлсэн байна. Гэвч тав зургаахан жилийн дараа цамхаг шаардлага хангаагүй суурийнхаа улмаас зүүн өмнө тал руугаа хазайж эхэлжээ. 1373 онд цамхгийн барилгын ажил дуусгавар болох үед 1.3 метрээр доош суусан байв. Ийнхүү 16.000 тонн жинтэй цамхаг дэлхийн хамгийн аюултай барилгуудын нэг болжээ.
 

Капитал хаалга, Арабын Нэгдсэн Эмират Улс
АНЭУ-ын нийслэл Абу Даби хотноо сүндэрлэх тэнгэр баганадсан барилгуудын нэг “Капитал хаалга” нь баруун зүг рүү 18 градус хазайсан байдлаар бүтээгдсэн  юм. 160 метр өндөр, 35 давхар тус байгууламж хотынхоо хамгийн өндөр барилгуудын нэг бөгөөд 2010 онд Гиннесийн номонд хүний гараар бүтсэн хамгийн налуу барилга хэмээн бүртгэгджээ.