Өнгөрсөн оны 6 дугаар сараас иргэдэд орон сууцны 8 хувийн хүүтэй зээлийг олгож эхэлсэн. Орон сууцны нийлүүлэлт хангалтгүй байгаа энэ үед Засгийн газар эрэлтийг дэмжсэн зээлийн хөтөлбөр баталлаа хэмээх шүүмжлэл гарч байсан ч иргэд тун таатай хүлээж авсан. Энэ хугацаанд арилжааны банкууд 18519 зээлдэгчийн нийт 536.1 тэрбум төгрөгийн ипотекийн зээлийг дахин санхүүжүүлж, 8 хувийн хүүтэй ипотекийн зээл рүү шилжүүлсэн бол 21383 иргэнд 1201.3 тэрбум төгрөгийн орон сууцны ипотекийн зээл шинээр олгохоор шийдвэрлэсэн байна.
     Харин энэ оны эхнээс эдийн засгийн хямрал нүүрлэж, үүнээс үүдэн барилга, орон сууцны салбар уналтанд ороод байгаа билээ. Түүнчлэн иргэдийн худалдан авах чадвар буурч орон сууцны эрэлт ч үүнийг дагаад зогсох хандлагатай болоод буй. Иймээс арилжааны банкууд найман хувийн хүүтэй орон сууцны зээл олголтыг хумиж эхлээд байна. Зарим банкууд зээлдэгчдэд тавих өөрсдийн шалгуураа өндөрсгөсөн бол зарим нь эрсдэлтэйд тооцогдсон ипотекийн зээлүүдээ цуцалж байгаа сурагтай.
      Өнөөдрийн байдлаар ХААН, Капитрон, Улаанбаатар хотын банк, Капитал зэрэг банкууд зээлийн санхүүжилт байхгүйн улмаас орон сууцны 8 хувийн хүүтэй зээлийн  олголтыг тодорхойгүй хугацаагаар зогсоогоод байгаа аж. Харин Хас, Голомт, Худалдаа Хөгжил, Төрийн банкууд зээлийн материал хүлээн авч байгаа ч шийдвэрлэх хугацааны хувьд удаашралтай байгаа гэлээ.