Энэ асуултанд “тийм” гэж хариулахуйц барилгын материалын хэд хэдэн үйлдвэрийн үйл ажиллагаатай  Барилга, хот байгуулалтын сайд Ц.Баярсайхан, тус яамны Барилга, барилгын материалын  бодлогын хэрэгжилтийг зохицуулах газрын дарга Б.Цэдэнсамба, Орон сууц дэд бүтцийн төслийн удирдагч Ц.Доржготов, Монголын Барилгын материал үйлдвэрлэгчдийн холбооны Гүйцэтгэх захирал О.Лхагвадорж нарын албаны хүмүүс танилцсан юм.   Барилга хот байгуулалтын яам /БХБЯ/-ны зүгээс барилга байгууламж барих болоод барилгын материал үйлдвэрлэх үйл явцтай газар дээр нь очиж танилцах ажлыг үе үе зохион байгуулдаг ч энэ удаад дэвшилтэт технологи нэвтрүүлж буй үйлдвэрүүдтэй танилцахыг чухалчилсан бололтой. 

“Монгол элс”-ийн канад технологи

Богино хугацаанд барилга барих канад технологийг нэвтрүүлэн үйл ажиллагаа явуулж буй үйлдвэрүүд Монголд цөөнгүй бий. Эдгээрийн нэг нь “Монгол элс” ХХК юм. Тэдэнд бусдаас ялгарах онцлог байсан учир хөнгөн ган каркасны үйлдвэрлэлийг сонгож авсан хэрэг.  Канад технологийн барилгын хамгийн дэвшилтэт технологи гэгддэг хөнгөн ган каркасны үйлдвэрлэл Монголд анх нээгдсэн нь энэ бөгөөд 1-3 хүртэлх давхар барилга барих боломжтой юм байна.  Энэ технологийн давуу тал нь барилгын үйлдвэрлэл болоод угсралтын хугацаа  маш богино байдагт оршдог гэнэ. Тухайлбал “Монгол элс” компаний хамт олон 200м² барилгын каркасыг 1 өдрийн дотор үйлдвэрлэх хүчин чадалтай болохыг гүйцэтгэх захирал Я.Азжаргалбаяр онцолж байсан. Мөн модон хийцтэй харьцуулахад эдлэгээ урт, галд тэсвэрлэх чанар өндөр болохыг ч дурьдсан.

үйлдвэр дотор
 

бэлдцүүд
 

Байшин барих үйлдвэр

Социалист нийгмийн үед “Байшин үйлдвэрлэх компинат” хэмээх газар байсныг дахин сэргээх зорилготой нэгэн компани үүд хаалгаа нээхээр өдөр шөнөгүй ажиллаж байна. 9-р сард үйлдвэрийнхээ барилгын нээлтийг хийж, 10-р сард үйлдвэрлэлээ эхлэхээр зорьж буй энэ хамт олныг “Гранд байшин” ХХК гэх бөгөөд үйлдвэрийнх нь үйл ажиллагаа жигдрээд ирвэл орос ах нарынх шиг угсармал байшин үйлдвэрлэх боломж Монголд бий болж байгаа юм. Өөрөөр хэлбэл барилгын компаниуд бэлэн болсон  хана болон  бэлдцүүдийг  худалдан аваад шууд угсрах боломжтой.  Гэхдээ энэ орос технологи биш бөгөөд герман чанарыг харуулах герман технологи гэнэ. Тийм ч учраас үйлдвэрийн үйл ажиллагаа жигдэртэл Герман инженерүүд ахлан ажиллах юм байна. Байшин үйлдвэрлэх үйлдвэр ашиглалтанд орсноор жилийн дөрвөн улиралд барилгын ажил явагдах боломжтой болох төдийгүй барилга барих үйл явц ч хурдсах гэнэ.
Тус компаний хамт олон байшин үйлдвэрлэх үйлдвэрийнхээ анхны захиалгыг  саяхан  авсан бөгөөд зах зээлийн үнээс харьцангуй хямд үнэтэй орон сууц байх тухай ярьж байсан.

Бүрэн автомат бас онлайн

Хөнгөн блокны үйлдвэр Монголд 20 гаруй бий. Харин хүний гар ажиллагааг халсан анхны үйлдвэр нь “Дорнын цас”ХХК юм.  Ашиглалтанд ороод 10 гаруй хонож буй энэ үйлдвэр Монголын хөнгөн блокны үйлдвэрлэлийг тэргүүлэх зорилго тавин ажиллаж байна. Тус үйлдвэр нь БНХАУ-ын технологийг нэвтрүүлж тэдний туршлагаар үйл ажиллагаа явуулж байгаа бөгөөд бүрэн хүчин чадлаараа ажиллаад эхэлвэл хоногт 500 м³ хөнгөн блок үйлдвэрлэх боломжтой. Бүрэн автоматаас гадна энэ үйлдвэр онлайн системийг ч мөн нэвтрүүлжээ. Энэ нь интернэтийн сүлжээтэй дурын газраас  үйлдвэрлэлийн үйл явцыг хянах боломжоор хангагдаж байгаа хэрэг юм. Зуурмаг зуурах,  зүсэх, хатаах, зөөвөрлөх бүх дамжлагыг техник хийх бөгөөд захиалагчийн хүссэн хэмжээгээр хөнгөн блок үйлдвэрлэх боломжтой юм байна. 

зүсэгч машин