Засаг дарга Э.Бат-Үүл захирамж гарган нийслэл хотын хамгийн “өндөр” настай буюу 1950-1960оны үед баригдсан барилгуудад чанар аюулгүй байдлын  шалгалт хийж, эрсдлийг тооцох ажлыг зохин байгуулахаар болжээ. Энэхүү ажлыг нэг сарын турш зохион байгуулах бөгөөд өнгөрсөн пүрэв гарагаас ажлын хэсэг гаран ажиллаж эхлээд байгаа юм байна.
Шалгалтыг Улаанбаатар хотын Захирагчийн ажлын алба, нийслэлийн Онцгой байдлын газар, нийслэлийн Ерөнхий төлөвлөгөөний газар, Мэргэжлийн хяналтын газар, “Улаанбаатар” цахилгаан түгээх сүлжээ ХК, Орон сууц, нийтийн аж ахуйн удирдах газрын холбогдох албан тушаалтан нар тус тусын үүрэг чиглэлийн хүрээнд хамтран явуулахаар тогтжээ.
 
      Нийслэлийн Онцгой байдлын газар орон сууцны барилга байгууламжийн 1 дүгээр давхар болон барилгын зоорийн давхарын өргөтгөлд үйл ажиллагаа явуулж буй байгууллага, аж ахуйн нэгж, иргэдийн барилгын ажлын зургийг мэргэжлийн байгууллагуудаар хянуулж, зөвшилцсөн байдал, объектын цахилгаан шугам сүлжээний монтаж, цахилгаан тоног төхөөрөмжийн төлөвлөлт нь стандартын шаардлагын дагуу хийсэн эсэх, орон сууцны барилгын гал тэсвэршилтийн зэрэглэл норм дүрмийн шаардлагад нийцэж байгаа  зэргийг шалгах бол нийслэлийн Ерөнхий төлөвлөгөөний газар орон сууцны барилга байгууламжийг паспортжуулах, тэдгээрийн чанар, насжилтыг тодорхойлох, газар хөдлөлтөд тэсвэрлэх чадварт хянан баталгаажуулалт хийх, эрсдэлтэй объектуудын зориулалтыг өөрчлөх, хүчитгэх эсхүл буулгах дүгнэлт гаргах зэрэг  ажлыг зохион байгуулах аж.

        Харин нийслэлийн Мэргэжлийн хяналтын газар өндөр насжилттай барилга байгууламж, тэдгээрийн хийц бүтээц, инженерийн шугам сүлжээний ашиглалтын хэвийн байдлыг шалгах бөгөөд шалгалтын нэгдсэн дүнг Нийслэлийн удирдлагын зөвлөлийн хуралдаанаар хэлэлцэн цаашид авах арга хэмжээг боловсруулах юм байна