Дотоод заслаа хэрхэн хийх талаар зөвлөгөө өгөх зорилгоор өнгөнүүдийн зохицол тэдгээрийн хүнд үзүүлэх нөлөөллийн талаар цувралаар хүргэж байгаа билээ.  Энэ удаа шар өнгийг онцолж байна.   Шар өнгө нь  өрнө дахинд амжилт, аз жаргал, оюун ухаан, сэтгэн бодох чадвар, авъяасын бэлгэдэл болдог гэнэ. Харин дорнын ард түмэн энэ өнгийг  эрдэм болон болон шашныг бэлгэдэл болгосоор иржээ. Шар өнгийн хадгийг багшдаа барьдаг бөгөөд өөр хүнд барьдаггүй ёсон ч бас бий.
Ихэнх тохиолдолд шар өнгийг аз жаргал, баяр баясгаланг бэлгэддэг хэмээн үздэг учир дэлхийн бараг бүх улсын такси шар өнгөтэй байдаг. Мөн дэлхийн томоохон машин түрээслэх фирмүүд энэ өнгийг сонгодог байна.
             Орон гэрт дулаан уур амьсгалыг бүрдүүлээд зогсохгүй сонин содон байдал, бүтээлч сэтгэлгээ, гэнэн, шийдэмгий, бардам байдлын илэрхийлэл нь шар өнгө юм. Нарны өнгө болоод ч тэр үү хөгжилтэй, томоогүй, хөдөлгөөнтэй зүйлсийг төлөөлөхөөс гадна шар өнгийг зонхилон сонгодог хүн бусдын анхаарлын төвд байхыг эрмэлздэг, уян хатан, хөгжилтэй нэгэн байх талтай хэмээн дорнын зурхайд тэмдэглэжээ.
            Сэтгэл зүйчид шар, улбар шар өнгө нь ходоодны шүүс ихээр ялгаруулан, шүлсний булчирхайг идэвхжүүлж, хоол идэх дур хүслийг өдөөдөг хэмээн тайлбарладаг. Иймд цайны газар, ресторанд энэ өнгийг ашиглах нь элбэг байдаг байна.
Дизайнерүүдийн зүгээс шар өнгийг хүний анхаарлыг татах гойд өнгөнүүдийн тоонд зүй ёсоор оруулдаг. Өнгийн халуун, хүйтэн гэж 2 ангилах нь бий. Шар өнгө энэ ангиллаар дулаан өнгөнд багтана. Улаанаас, шар хүртэлх бор, хүрэн, улаан хүрэн, улбар шар өнгө нь дулаан өнгөнд орох ч хүйтэн өнгөтэй ойролцоох шар өнгийг онцлох элементээр сонгох нь ч бий. Иймд шар өнгийг дотоод засалд сонгохдоо нэлэнхүйд нь сонгохоос илүүтэй хэсэг газрыг онцлох нь илүү загварлаг харагдуулдаг байна.
 Ингээд шар өнгийн дотоод заслын зургуудыг хүргэе. Сэтгэлд тань нийцнэ гэдэгт итгэлтэй байна.