Нийслэлд барилга барих газар олох нь өвсөн дотор зүү хайхаас ч хэцүү ажил болсон тухай барилгынхан ярьдаг. Энэ ч үнэний ортой. Энэхүү “хэцүү”-г давахын тулд танил тал, хээл хахууль болдог нь ч бас үнэн.  Үүнийг таслан зогсоохын тулд нийслэлийн Засаг даргын тамгийн газраас барилга барих газрыг зөвхөн дуудлага худалдаагаар олгодог болохоор шийдвэрлэсэн билээ. Уг ажлын эхлэл болгож хотын ерөнхий төлөвлөгөөнд тусгагдсан газруудаас 20 байршилд газар эзэмших эрхийн дуудлага худалдааг 9-р сард зохион байгуулах гэж байна. Дуудлага худалдаанд барилга барих хүсэлтэй хуулийн этгээд, иргэн, аж ахуйн нэгжүүд чөлөөтэй оролцож болох бөгөөд газар нь эзэмших эрхийн хугацаа, байршил зэргээсээ хамаарч дуудлага худалдааны анхны үнэ нь өөр өөр байх юм.
Түүнчлэн нийслэлээс өмнөх жилүүдэд ямар нэг дуудлага худалдаанд оролцолгүйгээр төрийн байгууллагуудтай хамтарч газар эзэмших эрх авсан иргэн, аж ахуйн нэгжийн эрхийг нь тодорхой болгох үүднээс газрын дуудлага худалдааны анхны үнийн төлбөрийг нэхэмжлэх ажлыг зохион байгуулжээ. Нэхэмжлэлийн дагуу төлбөрөө төлсөн иргэн, аж ахуйн нэгжүүдэд газар эзэмших эрхийг тодорхой хугацаанд сунгасан бол төлбөрөө төлөөгүй 91 иргэн, аж ахуйн нэгжийн газар эзэмших эрхийг хуулийн дагуу хүчингүй болгосон байна. Ийнхүү барилга барих газрыг заавал дуудлага худалдаагаар олгох бөгөөд энэ нь өмчлөх эрх бус тодорхой хугацаанд л эзэмших эрх олгож буй хэрэг юм.