Төр, иргэн хоорондоо зөвшилцөж, тус тусын үүргээ гүйцэтгэж чадвал хотын хур асуудлын захаас нь эхэлж шийдэж болдгийг харуулсан явдал бол Гандангийн дэнжийн 6-р гудамжны нээлт юм. Гэрэлгүй харанхуй, зам харгуй нь энхэл донхол, эвгүй үнэр ханхалсан дэд бүтцийн асуудлыг шийдэхээр Чингис Бондын хөрөнгөнөөс 300 сая төгрөг зарцуулж халуун хүйтэн устай, инженерийн дэд бүтцэд холбогдсон орчин үеийн жишиг гудамжны төрхийг бий болгож чадсан байна.”Гудамж” төслийнхэн цаашид тэндхийн бүх хэсгүүдийг ийм загвараар засч тохижуулах бөгөөд бетон суурь бүхий хашаагаар ижилсүүлэх юм. Гандангийн дэнжийн гэр хороолол нь нийт 55 га талбайг хамардаг бөгөөд нийт 31 гудамжны 857 хашаанд 1875 айл өрх амьдардаг аж. Тус гэр хорооллын ихэнх гудамж анхнаасаа хэт нарийн, эмх замбараагүй байгуулагдсан болохоор дэд бүтцийн ажил өрнүүлэхэд оршин суугчид идэвх санаачилга гаргаж, өөрсдийн оролцоотойгоор хашаа хорооны хэмжээг 1,5 метрээр багасган татсан нь төлөвлөлтийг үр дүнтэй зохион байгуулахад хувь нэмэр оруулсан хэмээн ажлын хэсгийнхэн онцолж байлаа. Энэхүү өөрчлөлтийг дагаад иргэдийн сэтгэлзүй ч өөр болох юм билээ, Гандангийн гудамжаар алхаж үзээрэй.