Манай улсын тулгамдсан асуудлын нэг нь дэд бүтэц байдаг тул 2013 онд Засгийн газраас 118 дугаар тогтоол гаргаж, хэд хэдэн хорооллын инженерийн байгууламжийг сайжруулахаар болсон. Үүний нэг нь Буян-Ухаа орчим.
Энд 11 компани 60 гаруй мянган айлын орон сууц барихаар төлөвлөсөн тул дэд бүтэц нь тэр хэмжээний оршин суугчдыг “тэжээж” дийлэхүйц байх шаардлагатай. Тиймээс эхний ээлжинд Хан-Уул дүүрэгт байрлах цэвэрлэх байгууламжийг өргөтгөсөн. Олон улсын жишигт нийцсэн, сүүлийн үеийн технологиор уг байгууламжийг шинэчилж, бохир усыг 98 хувь цэвэршүүлдэг болгосон.
 Ингэснээр Буянт-Ухаа орчим инженерийн байгууламжийн хувьд Улаанбаатар хотын бие даасан томоохон төв болох боломж бүрдэв. “Буянт-Ухаа” хорооллын инженерийн дэд бүтцийн барилга, байгууламжийг өчигдөр ашиглалтад орууллаа. БХБЯ-ны “Дэд бүтэц” төслийнхөн гүйцэтгэсэн уг ажилд “Чингис” бондоос 59.9 тэрбум төгрөг зарцуулсан байна.
Цахилгаан хангамжийн хуваарилах хоёр байгууламж, ус, дулаан дамжуулах 10 төв барьж, цэвэр усны хангамжийн 20 худаг, 2800 шоо метр багтаамжтай хоёр усан сан байгуулж, 14.1 км шугам хоолой угсарсан зэргээр “Буянт-Ухаа” хороололд дэд бүтцийн найман багц ажил хийжээ. Ирэх онд 20.000 шоо метр багтаамжтай цэвэрлэх байгууламж ашиглалтад оруулахаар ажиллаж байгаа аж.
 Ингэхдээ “Эс Энд Эй”, “Байгууламж”, “Монинжбар”, “Санжат” зэрэг аж ахуйн нэгжтэй хамтран ажиллажээ. “Дэд бүтэц” төслийн ерөнхий инженер М.Доржпалам “Барилгаа барьчихаад дараа нь дэд бүтцээ шийддэг жишиг манайд байсан. Харин энэ төслийн онцлог нь барилга барихаас өмнө инженерийн дэд бүтцийг шийдэж буй. “Буянт-Ухаа” хорооллын дэд бүтцийн тоног төхөөр өмжийг гаднын томоохон компаниас авчирч, угсарсан. Шаардлагынх нь дагуу ашиглахад 10-15 жилийн баталгаатай” гэлээ.
Тус хорооллын орчимд ойрын хугацаанд 15.000 айлын орон сууц, 7500 хүүхдийн сургууль, 3750 хүүхдийн цэцэрлэг, 60 ортой ахмадын, өдөрт 1315 хүн үзэх өрхийн, 300 ортой төрөх эмнэлэг, төрийн байгууллага, их, дээд сургууль болон спорт цогцолбор барихаар төлөвлөсөн байна. Барилга, хот байгуулалтын сайд Ц.Баярсайхан “Дэд бүтэц” төслийн гүйцэтгэсэн энэ ажлын дүнд Буянт-Ухаад 42.000 айлын орон сууц, 26.700 хүүхдийн сургууль, 7100 хүүхдийн цэцэрлэг, өдөрт 4350 хүн үзэх эмнэлэг, 2000 ажлын байртай худалдаа, үйлчилгээ, зочид буудал, спортын ордонтой долоон хороолол шинээр барих боломж бүрдлээ.
 УИХ-аас баталсан Шинэ бүтээн байгуулалт дунд хугацааны зорилтот хөтөлбөрийг хэрэгжүүлэх хүрээнд Засгийн газрын 2013 оны 118 дугаар тогтоолын дагуу “Дэд бүтэц” төсөл Улаанбаатар хотод шинээр барих орон сууцны шинэ хорооллуудад дэд бүтцийн 26 багц ажил хийж байгаа. Үүнд ус, дулаан дамжуулах 20 төв, цахилгаан хангамж хуваарилах таван байгууламж, 250-640 кВт-ын хүчин чадалтай 59 дэд станц барьж, 112.2 км кабель шугам угсарч, цэвэр усны хангамжийн гүний 20 худаг, 2800 шоо метрийн багтаамжтай хоёр усан сан, 30 гаруй км шугам хоолой угсарна.
Улаанбаатар хот төдийгүй аймгуудын төвд 1000 айлын орон сууц барихын өмнө инженерийн дэд бүтцийг нь шийдэж эхэлсэн. Төв, Өвөрхангай, Завхан, Архангай аймгийн бүтээн байгуулалттай танилцлаа. Нийт 16 суманд инженерийн шугам сүлжээ тавьж байна. Мөн НҮБ-ын Хөгжлийн хөтөлбөртэй хамтран, найман сумыг инженерийн дэд бүтэцтэй болгохоор боллоо” гэсэн юм.