Гадна тохижилтоороо гангарсан хотхон
Шинээр сүндэрлэн босож байгаа барилгууд нийслэл хотын өнгө төрхийг өдөр өдрөөр нэмсээр байна. Барилга, орон сууц олноор баригдахын хэрээр компаниудын хооронд өрсөлдөөн бий болох нь гарцаагүй. Зах зээлийн хуулиа дагаад. Тиймдээ ч сүүлийн үеийн орон сууцны хотхон хорооллууд ногоон байгууламж, гадна тохижилтоороо өрсөлдөх болжээ.
Монголын номер нэг ногоон байгууламжтай гэгдэх сурталчилгаатай “River Garden” хотхоны гадна тохижилтыг сонирхон сурвалжилснаа толилуулъя.
Маршалын гүүрнээс баруун тийш 150 метрт, Богд Хан уулын ард, Туулын голын хөвөөнөө “Ривер Гарден” хотхон хороолол байрлана. Тус хорооллын үүдээр орох үед хамгаалагч залуу бичиг баримт шалгаж, бид ч сурвалжлага хийх гэж байгаа учир явдлаа хэлээд хотхон дотор нэвтэрч орлоо. Харуулын байрнаас орчин тойрныг камераар хянаж байдаг бөгөөд харуул хамгаалалт сайтай, хамгаалагч нар ч соргог сэрэмжтэй хүмүүс аж.
Хотын төвийн агаартай харьцуулахад тэнд цэнгэг агаартай болохыг мэдэрлээ. Уг хотхоныг “Номин Констракшн” ХХК барьж гүйцэтгэсэн.
Хотхоны хашаагаар оронгуут орон сууцны хоорондох зайнд зүлэг ногоо, мод зэргийг үнэхээр сайхан тарьж, арчилдаг нь нүднээ илт харагдах бөгөөд тарьсан моддын ихэнх нь шилмүүст мод харагдав. Зүлэг, мод бүрийг арчилж, усалж ургуулж байдаг хүмүүс байрнуудын дундуур явж усалгаа, тордолгоо хийж яваа харагдана.
Хотхоны үүдээр оронгуут харагдах байдал
Оршин суугчдын амарч, салхилах цэгүүд олонтой, түр саатаад суучих сандал, сүүдрэвч зэргийг нарийн зохион байгуулалттай байршуулсан нь үнэхээрийн сэтгэлд таатай санагдсан. Явган хүний зам дагуу гэрлийн шонгуудыг ойр ойрхон байрлуулсан нь үдэш оройн цагаар ч байрныхаа гадаа зугаалах таатай байх орчинг бүрдүүлж чаджээ.
Хүүхдүүдийн тоглож наадах тоглоомын талбайг орон сууцны хооронд тус бүрт нь шийдэж өгчээ.
Хотхон дотор амарч салхилах таатай орчинг бүрдүүлжээ
Ногоон байгууламжийн тохижилтын байдал
Хотхоны урд хэсэгт хиймэл цөөрөмтэй, баруун талд сагсан бөмбөг, хөлбөмбөг, газрын теннесийн талбайтай. Цөөрмийн захаар түр амрах сандал, тавцанг байрлуулж, цөөрмийн дунд хэсгээр гүүр тавьсан нь хиймэл хүрхрээн хоржигнох чимээнд нь чихээ амраа гэсэн шиг таатай байлаа. Энэ цөөрөм яах аргагүй тус хотхоны нэгэн чимэг болсон гэлтэй. Өмнө нь тогтсон байсан жижиг цөөрмийн усыг эргэлтэнд оруулж энэхүү урт цөөрмийг бий болгожээ. Цөөрмийн голд хос хунгийн хөшөөг босгосон нь мөн л чамин дэгжин харагдана. Цөөрмийн ард байрлах сандал дээр суугаад Богд Хан уулыг ажин суух таатай нөхцлийг бүрдүүлж чаджээ.
Тус хотхоны урд байрлах цөөрөм
Гаднаа байх энэ сайхан орчинг шууд орон сууцныхаа том цонх, тагтан дээрээс харна гэдэг үнэхээрийн сайхан мэдрэмжийг авах 380 айлын оршин суугч нарт нэгэн бодлын атаархах сэтгэл төрж, нөгөө талаар манайд ийм зэргийн хотхон бий болсонд дотроо баярлах, бусад нь үлгэр дуурайл авч хэрэгжүүлсэй гэх бахдах сэтгэл төрж байлаа. Хотхоны гадна байдалтай танилцаж явах үед “би чухам Монголдоо байгаа нь үнэн үү” гэж өөрөөсөө үе үе асуумаар санагдсан шүү.
Тус хотхоны урд орших цөөрмийн арын замаар нялх үрээ салхилуулан яваа ээжүүдийн нүүр царайнд цаанаа л нэг тайвшрал, мишээл тодрон харагдана.
Харин цөөрмийн урд хэсгээр нохойн хошуу, бутлаг ургамалуудыг тарьжээ.
Гадна тохижилт, орон зай зэргийг сайн төлөвлөж хүн амьдрахад ая тухтай сайхан орчинг бүрдүүлсэн нь яах аргагүй цогц шийдэл болжээ. Үүдэн хэсэгт оффисын зориулалттай барилга баригдаж байгаа бол баруун талдаа тус хотхоны “Ривер Гарден-2” хэсгийн барилга ажил явагдаж байв.
Цөөрмийн дэргэдэх сандал дээр хэдэн хором сууж саатангаа тус хорооллын байрлалыг ажиглахад хойд талд төв цэнгэлдэх хүрээлэн, хүүхдийн парк, зүүн хойд талд нь Үндэсний цэцэрлэгт хүрээлэн, зүүн талдаа Маршалын гүүрээр гараад “Скай ресорт” явах замтай холбогдож, хойд талын замаараа яваад Зайсангийн гүүртэй холбогдоно. Ингээд бодоход бас л ашигтай байрлал дээр энэ хотхон баригджээ.
Ороод гарахад үнэхээрийн сэтгэл ханамж өндөртэй, нам гүм орчинд тансаг зэрэглэлийн гадна тохижилттой, ийм нэг хотхонтой танилцсандаа урмын сайхан мэдрэмжийг авлаа.
Хүүхдийн тоглоомын талбай
Цөөрмийн ард байрлах явган хүний зам
Орон сууцны хооронпох ногоон байгууламж
Цөөрмийн баруун талд байрлах хөлбөмбөг, сагсан бөмбөг, газрын теннесний талбай
Энэ мэт дэвшилттэй бүхнээс бусад барилгын компаниуд бүтээлчээр тусган авч бүтээн байгуулах ажил болгон хүний сайн сайхны төлөө гэсэн сэтгэл гаргасан үр дүнг харуулж байгаасай, цаашид ч ийм үйлс бүтээл хэвшил болж хэрэгжинэ дээ гэж итгэнэ.