Манай улсын гадаад худалдааны 70 гаруй хувийг дангаараа эзэлдэг БНХАУ-тай бизнесийн найрсаг хамтын ажиллагаатай байх нь чухал юм. Барилгын салбарынхан мөн ялгаагүй хэрэгцээт бараа бүтээгдэхүүнийхээ ихэнх хэсгийг энэ улсаас  тээвэрлэдэг. Тийм ч учраас өнөөдөр “Чингис хаан” зочид буудлын хурлын танхимд болсон Монгол, Хятадын аж ахуйн нэгжүүдийн эдийн засаг, худалдааны хамтын ажиллагааны анх дугаар чуулганд барилгын мэргэжлийн төрийн бус байгууллагынхан идэвхтэй оролцлоо.




Энэхүү чуулганыг Монгол-Зэжяны худалдааны нийгэмлэгээс санаачлан зохион байгуулж байгаа бөгөөд БНХАУ-ын дарга Ши Зиньпин манай улсад айлчлахаас хэдхэн хоногийн өмнө зохион байгуулагдаж байгаагаараа онцлог юм. Чуулганд Эдийн засгийн хөгжлийн дэд сайд О.Чулуунбат, БНХАУ-аас Монголд суугаа Элчиг сайд Ван Сяолун, Нийслэлийн Хот байгуулалт, хөрөнгө оруулалтын асуудал хариуцсан орлогч С.Очирбат нарын албаны хүмүүс болон 2 улсын бизнесийн байгууллагын төлөөлөгчид оролцон санал бодлоо солилцсон юм.