Барилга, хот байгуулалтын яамны “Дэд бүтэц” төслийн хүрээнд Сонгинохайрхан дүүргийн нэгдүгээр хороо Баянголын аманд ус, дулаан дамжуулах төв болон  цахилгааны дэд станцыг барьжээ. Ингэснээр шинээр баригдах орон сууцны хорооллууд инженерийн шугам сүлжээнд холбогдох боломжтой болж байгаа юм.
       Нийслэлийн Иргэдийн Төлөөлөгчдийн хурлаас 2 жилийн өмнө Баянголын аманд 450 га газарт ерөнхий төлөвлөгөө хийсэн бөгөөд энэхүү төлөвлөгөөгөөр 18435 өрхийн 70055 хүн амьдрахаар тооцсон байна. Үүнээс эхний ээлжинд  42 га талбайд 2000 айлын орон сууц, 90 га талбайд 6000 айлын орон сууцны хороолол болон бага орлоготой иргэдэд зориулсан түрээсийн орон сууц, ШУТИС-ийн цогцолбор барилга барихаар төлөвлөжээ.


     Одоогоор уг газарт орон сууцны хорооллын барилга угсралтын ажил бүрэн дууссан бөгөөд тоног төхөөрөмжийн угсралт, дулаалга, цахилгааны ажлууд болон гадна тохижилтыг хийж дуусчээ.  Түүнчлэн техникийн комисс ажиллахад бэлэн болсон бөгөөд гэрээт ажлыг ирэх 9 дүгээр сард багтааж Улсын комисст хүлээлгэн өгөхөөр ажиллаж байгаа аж.
Уг ажлын гүйцэтгэгчээр  “Цацрах цог” ХХК, “Монцахэр ХХК, “Баянтогтоц” ХХК, “Да хот” ХХК, “Шугам” ХХК, “Одкон холдинг” ХХК -иудын түншлэл ажилласан байна.