Засгийн газраас  орон нутагт баригдах орон сууцны хороолол болон гэр хорооллын инженерийн дэд бүтцийн барилга, байгууламж, шугам сүлжээний  ажлуудыг  хийхээр батласан. Барилга, хот байгуулалтын яамны “Дэд бүтэц” төсөл хариуцаж ажиллаж байгаа эдгээр ажлын нэг хэсэг болох “Буянт-Ухаа” орон сууцны хорооллын цахилгаан хангамжийн хаалттай дэд станцуудын ажлын гүйцэтгэл дуусч байгаа гэнэ. Энэхүү ажлыг “Мон энержи консалт” ХХК, “Си эф си групп” ХХК-иуд  түншлэл  гүйцэтгэгчээр хамтран хийж гүйцэтгэжээ.
Буянт-Ухаа орон сууцны хорооллын цахилгаан хангамжид зориулан 10кВ-ын түгээх сүлжээнд ойролцоо тооцоогоор 9.9 МВт орчим чадлын хэрэглээг хангах 10 кВ-ын хуваарилах байгууламж 2 иж бүрдэл, 2*400кВа чадалтай ТП 25 иж бүрдэл, 33.0 км урт 10 кВ-ын кабель шугам, зураг төсөл, барилга угсралтын ажлыг 1 жилийн хугацаанд хийсэн байна.

Уг дэд өртөө ашиглалтанд ороход шинээр баригдах Буянт-Ухаа хорооллын орон сууцны 40 хувийг цахилгааны эх үүсвэрээр хангах боломж бүрдэж байгаа юм. Олон улсын жишгээр энэхүү цахилгааны хаалттай дэд өртөөг угсархад хамгийн багадаа 2 жилийн хугацаанд хийж гүйцэтгэдэг бол монгол инженерүүдийн ур ухаан шингэсэн үндэсний компаниуд ганцхан жилийн хугацаанд хийж гүйцэтгэж чадсан тухай мэргэжлийнхэн ярьж байсан.