Бат-Очирын Эрдэнэчимэг

\1955-2014\

           Монгол Улсын зөвлөх инженер, “Хөнгөн бетон” ХК-ний ТУЗ-ийн дарга, ардчилсан хувьсгалын анхдагчдын нэг, Ардчилсан намын ҮЗХ-ны гишүүн асан Бат-Очирын Эрдэнэчимэг 2014 оны хоёрдугаар сарын 01-ний өдөр хүнд өвчний улмаас таалал төгсөж, бид бүхэнд нөхөж баршгүй гарз тохиолоо.

        Тэрээр 1955 онд Улаанбаатар хотод Бат-Очирын 3 дахь хүүхэд болж төрсөн бөгөөд 1972 онд Нийслэлийн 33 дугаар дунд сургууль, 1977 онд Политекникийн дээд сургуулийг барилгын материалын инженер мэргэжлээр төгссөн.

         Б.Эрдэнэчимэг нь ажлын гараагаа Ханын материалын үйлдвэрийн лабораторийн эрхлэгчээр эхэлж, Барилгын яамны ахлах мэргэжилтэн, “Хөнгөн бетон” ХК-ний дарга, захирал, ТУЗ-ийн даргын албыг олон жил үр бүтээлтэй хашсан барилгын салбарын тэргүүний удирдагч, сурган хүмүүжүүлэгч байсан төдийгүй нийгмийн зорилтот бүлэг, өнчин хүүхдүүдийг асарч дэмжих “Энэрэл Ивээл” сангийн удирдагч, энэрэнгүй үйлстэн, хүмүүнлэгийн элч нэгэн байлаа.

         Б.Эрдэнэчимэг нь Монгол улсад ардчилсан хувьсгалыг эхлүүлэх, ардчилал, эрх чөлөөг бэхжүүлэх, эх орноо хөгжүүлэх үйл хэрэгт өөрийн оюун бодол, ухамсарт амьдралаа зориулж, нам төрийн сонгуульт ажлыг хариуцлагатай, нэр төртэй гүйцэтгэж ирсэн нийгмийн зүтгэлтэн, шилдэг эмэгтэй удирдагчдын нэг байсан.

      Тэрээр Шилдэг удирдагч эмэгтэй, Шилдэг менежер, Европын Сэргээн Босголт Хөгжлийн Банкны шилдэг менежерээр шалгарч байсан бөгөөд түүний хөдөлмөр, зүтгэлийг Төрөөс өндрөөр үнэлж Алтан гадас одон, Хөдөлмөрийн хүндэт медаль, Ардын хувьсгалын ойн медалиуд, Ардчиллын одон, Барилгын салбарын тэргүүний ажилтан цол, тэмдгээр шагнасан юм.

       Бидний хайрт ээж, халамжит хань, энэрэлт эгч, элбэрэлт дүү, хүндэт нөхөр Таны шударга, хөдөлмөрч, хүнлэг, энэрэнгүй зан, эх орон, ард түмэн, хамт олноо эрхэмлэн хүндэтгэдэг эрхэм нандин чанар, гэгээн дүр үр хүүхэд, хань ижил, ах дүү, төрөл төрөгсдийнхөө сэтгэл зүрхэнд үүрд орших болно.

Ум сайн амгалан болтугай