ДОЛЛАРЫН ХАНШИЙГ БУУЛГАВАЛ БАЙРНЫ ҮНЭ БАГАСАХ БОЛОМЖТОЙ-

Энэ онд 30 гаруй мянган айлын орон сууц шинээр ашиглалтад орно. Тиймээс иргэд зах зээлийн хуулиар байрны үнэ тогтворжих болов уу гэж найдаж суугаа юм. Нийлүүлэлт нэмэгдэхээр үнэ буурдаг зах зээлийн хууль хачихалтай нь манай улсад эсрэгээрээ үйлчилж байна. Учир нь эрэлт их байх тусам барилгын компаниуд иргэдийн сонирхол дээр тоглож, метр квадратынхаа үнийг хөөрөгддөг.

Барилгын салбарын зарим гүйцэтгэгчид хэлэхдээ “Өнөөдөр байрны үнэ харин ч хямд байгаа” гэсэн мэдээлэл өгөв. Энэ нь долларын ханштай харьцуулахад тийм харагдаж байгаа хэрэг аж. Барилгын ихэнх компаниуд валютын ханшийн хэлбэлзлийг харгалзан метр квадратынхаа үнийг долларын ханшаар үржүүлдэг. Тухайлбал, байрны нэг метр квадрат нь 1400 доллар гэж бодъё. Түүнийг монгол мөнгөнд шилжүүлэхэд (1 төгрөг=1780 доллар) 2 сая 500 орчим мянган төгрөг болно. Ингэж төгрөгийн ханшаар бодож хараад байхаар барилгын үнэ өндөр мэт тусч байгаа аж. Энэ нь бас бага үнэ гэнэ. Мөн метр квадрат нь 1400 ам доллар байхад түүнээс тухайн барилгын компани 30 хувийн буюу 420 орчим долларын ашиг унагадаг жишээтэй байна.

-ХҮЛЭЭЖ ЧАДВАЛ ОРОН СУУЦНЫ ҮНЭ БУУРНА-

Ирэх оны төсөвт долларын ханшийг 1340 төгрөгөөр бодож тусгасан. Тэгэхээр шинэ байрны метр квадратын үнэ буурна гэсэн хүлээлт ард иргэдийн дунд үүсээд буй. Иймд орон сууц авахаа азнаж бай гэж зарим нь дотно хүмүүстээ зөвлөж байгаа сурагтай. Долларын ханшийг бүр 1200-д хүргэх боломж ч бий аж. Тиймээс орон сууцны үнийг бууруулах хамгийн гол хөшүүрэг нь долларын ханшийг буулгах гэдэгтэй хэн хүнгүй санал нийлэх биз ээ.  

Гуч гаруй мянган айлын орон сууц баригдаад эхлэхээр өрсөлдөөн бий болно. Хүлээж чадвал орон сууны үнэ буурах магадлалтай. Тиймээс дурын нэгэн барилгын компанид бусдаасаа өрсөж, метр квадратын үнээ 100-200 мянган төгрөгөөр нэмэх боломж хомсдоно.

Нэгэн компанийн захирал зовлон тоочиж сууна. Тэрээр 1000 айлын орон сууц барьсан байна. Гэтэл барилга нь санаан зоргоор зарагдчихаагүй, зөвхөн 200 нь борлогдсоноос 30 нь л бэлэн мөнгөөр тооцоо хийгджээ. Үлдсэн 170 нь урт хугацааны зээлд хамрагдсан аж. Өнөөдөр манай Монголын барилгын салбарт ийм л дүр төрх түгээмэл ажиглагдаж байна.

-БАРИЛГЫН МАТЕРИАЛЫН ҮНЭ ХАРЬЦАНГУЙ ТОГТВОРТОЙ БАЙНА-

Орон сууцны үнийг хөөрөгддөг гол хүчин зүйл болох цемент, арматур болон бусад барилгын материалын үнэ харьцангуй тогтвортой байгаа аж. Засгийн газраас барилгын материалын үнийг тогтвортой байлгахын тулд 270 гаруй тэрбум төгрөгийн хөнгөлөлттэй зээлийг 70 гаруй аж ахуй, компаниудад олгосон. Төрөөс хэрэгжүүлж буй бодлого хөтөлбөрт ийнхүү хамрагдсан аж ахуйн нэгжүүдийн барилгын үнэ нэмэгдээгүй байна. Хөнгөлөлттэй хөрөнгө оруулалтаар босч буй барилгын ихэнх нь ирэх оны зургадугаар сараас ашиглалтад орно. Тэгэхээр үнэ тогтворжино гэж ойлгож болох нь.

Барилга бол манай улсын эдийн засгийн тэргүүлэх салбар. Энэ салбараа төрөөс байнга дэмжих нь зохисгүйг мэргэжилтнүүд хэлж байна. Өнөөдрийн байдлаар барилгын салбарт 600 гаруй аж ахуйн нэгж идэвхтэй үйл ажиллагаа явуулж байгаагаас 70 гаруй нь хөнгөлөлттэй зээлд хамрагджээ.

Энэ жилээс дотоодын цементийн үйлдвэрүүд ашиглалтад орчихвол барилгын салбарынхан сандрах хэрэггүй болох юм.