Төрийн орон сууцны корпорацийн захиалгаар “Үндэсний бүтээн байгуулалтын корпораци” нэрийн дор нэгдсэн үндэсний таван компанийн хамтран барьж буй “Буянт Ухаа” хорооллын эхний ээлж болох 567 айлын орон сууцны барилгыг өнөөдөр ашиглалтад орууллаа. Нээлтийн  арга хэмжээнд Монгол улсын Ерөнхий сайд Н.Алтанхуяг, Барилга, хот байгуулалтын сайд Ц.Баярсайхан, Улаанбаатар хотын захирагч Э.Бат-Үүл, ТОСК-ын захирал А.Гантулга, Үндэсний бүтээн байгуулалт корпорацийн захирал А.Бат-Эрдэнэ болон үндэсний 5 компаний удирдлага, бусад албаны хүмүүс оролцлоо.

          Нээлтийн үеэр Монгол улсын Ерөнхий сайд Н.Алтанхуяг хэлсэн үгэндээ:

“Одоогоос жилийн өмнө 1 дүгээр сарын 18-ны өдөр Делта констракшны Бат-Эрдэнэ захирал манай өрөөнд ирж Монголын үндэсний барилгын компаниуд нэгдэж нийлээд боломжийн өртөг зардлаар гайгүй чанартай орон сууцны хорооллыг богино хугацаанд барьж чадна гэсэн саналыг тавьж байлаа. Харин Засгийн газраас энэ саналыг дэмжиж барилгын 5 компани нэгдэж Үндэсний бүтээн байгуулалтын корпорацийг байгуулснаар 4 дүгээр сарын 18-нд энэ газарт ирж шав тавьсан. Энэ өдрөөс хойших богино хугацаанд ямар их бүтээн байгуулалтыг хийж чаддагийг Монгол барилгачид маань харуулж чадлаа. Нийтдээ 1700 айлын орон сууц барих ёстойгоос өнөөдөр 500 айлын орон сууц ашиглалтанд орж байна. Эндээс бид төр засаг, хувийн хэвшил санаа сэтгэл нийлээд ажиллавал, тэр дундаа хувийн хэвшлийнхэн маань хоорондоо сэтгэл зүтгэл нэгдэж чадвал богино хугацаанд чанартай бүтээн байгуулалт хийж болохыг харж байна. Тиймээс энэ бүхнийг хийж чадсан Үндэсний бүтээн байгуулалт корпорацийн ерөнхийлөгч Бат-Эрдэнэ, нэгдэж нийлсэн 5 компаний удирдлага, бүтээн байгуулж чадсан ажилчид, барилгачиддаа баяр хүргэж, амжилт хүсье” гэлээ.

       Барилга, хот  байгуулалтын сайд Ц.Баярсайхан хэлэхдээ:

“Юуны өмнө энэ сайхан орд харшийг босгосон Үндэсний бүтээн байгуулалт корпарацийн удирдлагууд, нийт барилгачиддаа халуун талархал илэрхийлье. Барилгын салбарт бүтээн байгуулалт хийхэд хамгийн хүндрэлтэй байдаг зүйл бол ирэх жил юу хийх нь тодорхойгүй байх явдал юм. Харин хийх ажил нь тодорхой, санхүүжилт нь бэлэн байх юм бол барилгын салбарт ажиллагсдын тоо өсөх, тэдний нийгмийн асуудлыг шийдвэрлэх бололцоо манай барилгын компаниудад бий. Цаашдаа ТОСК, Нийслэлийн удирдлагууд аймаг, орон нутагтайгаа хамтраад нийт иргэдээ орон сууцаар хангах төрийн бодлогыг хэрэгжүүлэхэд энэ зарчмаар ажиллавал үр дүнд хүрэхнээ гэдэг нь харагдаж байна. Тиймээс цаашид хийгдэх хэсэгчилсэн ерөнхий төлөвлөгөөнд тусгагдсан бүтээн байгуулалтын ажлууд энэ маягаар явагдана. Мөн газрыг нь чөлөөлөх, дэд бүтцийг төрөөс байгуулж өгөх нь аливаа бүтээн байгуулалтын ажлыг хурдан гүйцэтгэхэд ихээхэн дөхөм үзүүлж байна. Шинэ бүтээн байгуулалт, 100.000 айлын орон сууц, Дэд бүтэц зэрэг төслийн хүрээнд орон сууцны 10 шинэ хороолол, гэр хорооллын дахин төлөвлөлтийн 12 байршилд дэд бүтцийн өргөтгөлийн ажлыг 2013 онд амжилттай хийж гүйцэтгэсэн. Түүнчлэн Буянт-Ухаа хороолол орчимд цэвэр усны шинэ эх үүсвэр, цэвэрлэх байгууламжийн өргөтгөл, цахилгаан, дулаан дамжуулах шугам сүлжээ, цэвэр бохир усны хоолойг шинэчлэх, өргөтгөх ажлуудыг хийж дуусгалаа. Бүтээн байгуулагчид маань энэхүү дэд бүтцийн ажилд идэвхитэй гар бие оролцсон. Ингээд Барилга, хот байгуулалтын яамны нэрийн өмнөөс Үндэсний бүтээн байгуулалт корпорацийн нийт бүрэлдэхүүнд ажлыг амжилт хүсье” гэлээ.

           Улаанбаатар хотын захирагч Э.Бат-Үүл нээлтийн ёслол дээр хэлсэн үгэндээ:

“Асар богинохон хугацаанд том бүтээн байгуулалтыг хийж бүтээсэн барилгачиддаа нийслэлчүүдийнхээ өмнөөс талархлаа илэрхийлье. Барилга байшин богино хугацаанд бариад зогсоогүй, Монгол хүн хийж бүтээх чадвартай гэдгийг харуулж, урам зориг өгсөн барилгачид та бүхэнд дахин баяр хүргэе. Өнгөрсөн усан могой жил Монгол хүн гайхалтай бүтээлч, хэнээс ч дутуугүй хийж бүтээж чаддаг гэдгээ харуулсан. Засгийн газар, төр засгийн байгууллагууд  бодлогоо саатуулалгүй, мөнгийг нь өгвөл үндэсний бүтээн байгуулагчид юуг ч хийж чаддаг, хийх хийхдээ хэнээс дутахааргүй хийж бүтээдэг гэдгийг харууллаа. Би өнгөрсөн жил хотын бүтээн байгуулалыг харсан гадны хүмүүс яриаг сонсож байхад “манай хотын авто зам, барилга байшин ямар хурдан шинэчлэгдэж байгааг хэлж, гайхаж байхыг хараад би их баярласан. Бас нэгэн оюутан надад хэлэхдээ “Шинэчлэлийн Засгийн газарт маш их баярлаж байгаа “Сэтгэл байвал юуг ч хийж бүтээж чадна гэдгийг харуулж байна. Үнэхээр талархаж байна” гэж хэлж байсан. Бид ирэх жилийн бүтээн байгуулалтанд ямар ч эргэлзэх зүйл байхгүй. Одоо Засгийн газар болон төр захиргааны байгууллага бидний зүгээс бүтээн байгуулалтыг мөнгө хөрөнгө сааталгүй өгөөд байя, бид бүтээж чадаж байна. Та бүхэнд маш их баярлалаа” гэсэн бол

        Үндэсний бүтээн байгуулалт корпорацийн захирал А.Бат-Эрдэнэ:

“Үндэсний бүтээн байгуулалтад гар бие оролцсон залуу барилгачид та бүхэнд баярлалаа. 23-тай залуугаас 65 настан хүртэлх насны хамт олон ажилласан. Залуучууд та бүхэндээ бидэнд итгэж найдаж, бололцоо олгосон Монгол Улсын Засгийн газар, Улаабаатар хотын захиргаа биднийг дэмжсэн бүх хүмүүст баярлаж талархаж байна. Залуучууд та нарынхаа нэрийн өмнөөс 5 сарын 23-ны өдөр “Буянт-Ухаа” хороолол 1700 гаруй орон сууцыг бүх зам талбай, зүлэг ногоо цэцэгтэй нь иж бүрнээр нь хүлээлгэж өгнө гэдгээ амлан хэлье. Залуучууд минь хичээгээрэй” гэсэн юм. 

        Төр засгийн удирдлагууд  Буянт-Ухаа хорооллын орон сууцны үнэ зах зээлийн ханшаас хямд байна гэж амласан. Одоогоор тус хорооллын орон сууцны метр квадратын үнэ хэд байх нь тодорхойгүй байгаа ч тун удахгүй борлуулалтын журам гарснаар үнэ тодорхой болж, захиалгаа авч эхлэх гэнэ. Уг хорооллын үлдсэн 16 блок барилгын угсралтын ажил, гадна фасадны өнгөлгөө, инженерийн шугам сүлжээний ажлыг дуусган, дотоод заслыг нь хийж байгаа. 2014 оны тавдугаар сарын 23-нд гадна байгууламж, зам талбай, машины зогсоол зэрэг бүх ажлыг бүрэн дуусгаж ашиглалтад оруулна гэж ТОСК-ийн захирал А.Гантулга амлалаа.

Сурвалжилсан: Б.Цолмонтуяа, И.Алтангэрэл