“Барилга” бизнес аялал

“Барилгын Зөвлөгөө Мэдээллийн Төв” төрийн бус байгууллагаас санаачилсан Герман, Турк улс руу хийх бизнес аялал 1 сарын 14-21 нд амжилттай зохион байгуулагдлаа. Энэхүү аялалд Авзага трэйд, Сонголон Хайрхан ХХК, Цэрэн интернэшнл, Москва комплекс, Дүүрэн трэйд, Байгууламж ХХК, Оргил Харгуй ХХК зэрэг барилгын салбарын компаниудын захирал, төлөөллөөс бүрдсэн 12 хүн оролцов.

Аяллын эхний өдөр урьдчилан бэлтгэсэн хөтөлбөрийн дагуу Герман улсын Дусселдорф хот руу нисч тэндээсээ Эссэн хотод хүрэлцэн ирсэн. Маргааш өглөө нь 2 жилд 1 удаа зохион байгуулагддаг Deubaucom үзэсгэлэнг үзэхээр Эссэн хотын үзэсгэлэнгийн төвийг аяллын бүрэлдэхүүн зорив.

'Deubaukom 2014" үзэсгэлэнг үзэхээс өмнө аяллын бүрэлдэхүүн зургаа даруулж буй нь

Холбооны Бүгд Найрамдах Герман улс нь Европын стандартад бүрэн нийцсэн барилгын материал үйлдвэрлэгч орны хувьд хүний биед сөрөг нөлөөгүй, эрчим хүчний хэмнэлттэй, шинэлэг чанартай барилгын материал үйлдвэрлэх тал дээр маш их анхаардаг нь харагдаж байлаа. Тус үзэсгэлэн яармагийн нийт 50.000 м² талбайд Герман болон ойр орчмын холбоот улсын шилдэг 600 гаруй компаниуд оролцож, шинэ дэвшилтэт технологи, өндөр чанартай брэнд барилгын материалууд, архитектор, интерьер дизайн, технологийн дэвшлийг дэлгэн харуулсан билээ. Нийт 4 хоног зохиогдсон үзэсгэлэн 4 үндсэн хэсэгт хуваагдан Deubaucom болон Infra tech танхимд барилгын материал, барилгын төлөвлөлт зураг төсөл, програмын чиглэлийн софтвэйр, DECOnex танхимд тоног төхөөрөмж Leben+comfort танхимд замын тоног төхөөрөмж, хэрэгслийн компаниуд өөрсдийн бүтээгдэхүүнийг танилцуулав.

Монголоос аялалд оролцож буй байгууллагуудын хувьд Герман улсын барилгын материал, тоног төхөөрөмжийг судалж, хамтран ажиллах боломж нөхцлийг олж харахад зорилготой байсан билээ. Үзэсгэлэнгийн үеэр хачирхалтай мөн Монголчууд бидэнд санаа авах зүйл олон байсныг нуух юун. Материал Experience хэсэгт тавигдсан барилгын материалууд нь тогтсон ойлголт бүхий жирийн иргэдэд сэдэл төрүүлэхүйц сонингийн цаасыг нягтаршуулж хийсэн хавтан, зэс утаснаас гаргаж авсан хөшиг, модны үртсийг ноос мэт болгож дулаалганд ашиглах материал, түүнчлэн хөнгөн блок хүртэл гаргаж авсан байлаа.

"Deubaukom 2014"  үзэсгэлэнгийн үеэр тавигдсан жинсэн материалыг нягтруулж гаргаж авсан барилгын хавтан

 Сонингийн цаасыг нягтруулж хийсэн хавтан

2 өдрийн турш компаниудтай танилцан мэдээлэл солилцсоноор аялалд оролцогч байгууллагууд маань хамтарч ажиллах, туршлага хуваалцах олон олон боломжийг олж харсан нь лавтай.

          Ингээд хөтөлбөр цааш үргэлжилж Германы Изолир Вендт дулаалгын материалын компанитай уулзалт хийв. 140 жилийн туршлагатай уг компани нь байгаль орчинд ээлтэй, дуу чимээнээс тусгаарлах чанартай дулаалгын материалыг нийлүүлэхээс гадна хамгийн гол нь дулаалагч болон тусгаарлагч материалыг зөв угсрах зөвлөгөөг өгөх үйлчилгээг давхар үзүүлдэг.

"Изолир Вендт" Дулаалгын материалын компанитай хийсэн уулзалтын үеэр

 Эрчим хүч үйлдвэрлэх явцад дулаалга, тусгаарлалтыг муу хийснээс үүдэн байгаль орчинд үзүүлэх хор хөнөөл улам ихэсдэг. Түүнчлэн засвар үйлчилгээний зардал ихэсч турбин, генераторуудын сул зогсолт нэмэгдсэнээс өртөг улам өсдөг. Монгол орны хувьд байшин барилгад хямд үнийг бодож Хятад улсын дулаалгын материалыг давамгайлан ашигласны дараа  урсгал зардал ихэсч хэмнэлт бус зарлага ихээхэн гаргаж байна.

Уулзалтын үр дүнд оролцогч компаниуд Монгол улсад дулаалгын материалыг хэрхэн зөв угсрах, ажилтан боловсон хүчнээ сургах тал дээр хамтарч ажиллахаар тохиролцсон билээ.

Аяллын багийнхан маань Турк улсад Босфорын хоолойгоор усан онгоцоор аялж байх агшин       

Герман улсад 3 хоносны дараа бид Турк улс руу аяллын жолоог чиглүүлж агаарын хөлгөндөө сууцгаалаа. Турк улс нь эртнээс худалдаа, үйлдвэрлэл өндөр түвшинд хөгжсөн орон бөгөөд хоёр орны хооронд шууд нислэгтэй болсон нь тус орны компаниуд Монгол орныг ихэд сонирхоход хүргэж байна. Магадгүй хэдэн жилийн дараа Турк улс гадаад харилцааны хувьд манай гуравдагч хөрш болохыг үгүйсгэх аргагүй. Тус улсад хүрэлцэн ирсний удаах өдөр бид Ахмед Султаны мөргөлийн сүмээр орж одоогоос 600-аад жилийн өмнөх түүх дурсгал, уран барилгын хосгүй сайхныг шагширч бахдахын сацуу Истанбул хотыг тойрсон цайзны туурийг замдаа сонирхсон юм. 30 гаруй км үргэлжлэх Хятадын цагаан хэрэмнээс дутахааргүй сонирхол татах уг хэрмийн үлдэгдлийг орчин үеийн барилгуудтай чадварлаг зохицуулан барьсан нь тус улс үндэснийхээ соёл өвийг өндөр түвшинд хамгаалж хадгалж үлддэг болохыг харуулж байв. Дараа нь Туркийн Info Tech барилгын компаний туслалцаатай 15 барилгын материал үйлдвэрлэгч болон нийлүүлэгч компанитай уулзалт хийж цаашид Монголд нийлүүлж болох бараа материалын компаниудтай танилцан хамтын ажиллагааны суурийг тавьж чадсан юм.

       Турк улстай худалдааны болон хамтын ажиллагааг хөгжүүлэхэд барилгын холбоо, танхимуудтай ойр байх нь тун чухал.

Туркийн худалдаа, аж үйлдвэрийн танхимтай хийсэн албан ёсны уулзалтын үеэр

Энэ ч үүднээс аяллын сүүлийн өдөр бид Туркийн худалдаа, аж үйлдвэрийн танхимтай албан ёсны  уулзалт хийж хоёр орон барилгын салбарт худалдаа, үйлдвэрлэлийг хөгжүүлэх тал дээр нэгдэж ажиллах шаардлага өндөр байгааг онцлон тэмдэглээд Монголоос төлөөлөн очсон барилгын компаниудын үйл ажиллагаанд түншлэх 40 гаруй барилгын компаниудтай тойрог уулзалт хийв. Барилгын Зөвлөгөө Мэдээллийн Төвөөс зохион байгуулсан энэхүү бизнес аялалд оролцсон барилгын компаниудын захирлууд мааньгадаадын компаниудтай харилцах үүд хаалгаа цэлийтэл нээгээд зогсохгүй дотно найз нөхдүүд болж чадсан билээ.