"Барилга Евро Тур" барилгын  салбарынханы хүрээнд зохион байгуулагддаг бизнес аялал энэ удаад Германы Берлин, Чехийн Прага хотуудыг зорьсон юм. Бизнесийн шинэ санаа, барилгын материал, дэвшилтэт технологийн судалгаа хийхийн сацуу тухайн орныхоо түүх соёлтой танилцах боломжийг хослуулсан бизнес аяллыг Барилгын Зөвлөгөө Мэдээллийн Төвөөс амжилттай зохион байгуулж Немон ХХК, Минж Проперти, Тэргүүн Чансаа ХХК, “ОЧББ” ХХК, “ТТЭЗ” ХХК, Сэкуд ХХК, Ди Эл Жи ХХК зэрэг байгуулагуудын нийт 14 хүн оролцлоо.

       Аялал Герман болон Бүгд Найрамдах Чех улсыг хамарсан  бөгөөд 2014 оны 2 сарын 16-нд өглөөний 8 цагаас шууд нислэгээр Берлин хотод хүрэлцэн ирсэн юм.

Ажил, амралтыг тэнцүүхэн хослуулахыг зорьсон манай байгууллагын бэлтгэсэн хөтөлбөрийн дагуу эхний өдөр хоттой танилцан, ялалтын хөшөөг үзэж Германы үндэсний хоол зооглон аяллын гишүүд танилцсан бөгөөд дараа өдрийн хөтөлбөрт бэлтгэн эртлэн амарсан билээ.

    Ингээд хоёр дахь өдөр нь Германы Берлин хотоос 60 км зайтай орших Европын хамгийн томд тооцогдох Тропик арал амралтын газарт хүрэлцэн ирэв. Асар том байгууламжийг халуун орны ширэнгэн ой, далдуу мод,  далайн эргийн тайван орчинг бүрдүүлсэн сайхан орчинд олон хүн цагийг хөгжилтэй өнгөрөөсөн. Бидний хувьд энэ үзэсгэлэнт газарт амраад зогсохгүй адил 4 улиралтай манай оронд өвлийн цагт ийм нэгэн амралтын орчинг бүрдүүлэх боломж бий эсэхийг харж явлаа. Олон хүн сэтгэл, зориг нэгдэн бүтээж чадвал хүүхэд залуус, гэр бүлээрээ цагийг хөгжилтэй өнгөрөөгөөд зогсохгүй манай орны аялал жуулчлалд ч шигтгээ болох газар ажээ.

 

       Маргааш өглөө нь 2 жилд 1 удаа зохиогддог орчин үеийн барилгын  хийц технологи болон барилгын бүх төрлийн материалын Bautec үзэсгэлэнг үзэхээр Берлиний үзэсгэлэнгийн төвийг зорив. 2014 оныг хүртэл 16 дахь удаагаа зохиогдож буй уг үзэсгэлэн нь Германы хамгийн том барилгын салбарын худалдааны чиглэлийн үйл ажиллагаа юм.
 

 Үзэсгэлэнгийн үеэр
 

   Энэхүү үзэсгэлэнд Германы барилгын материал, барилга угсралт, уран барилга, барилгыг шинэчлэн засварлах, дуу болон галаас сэргийлэх, бохирын систем, сэргээгдэх эх үүсвэрийг ашигласан барилга зэргийг дэлгэн харуулжээ. Үзэсгэлэнд анхаарал татсан мөн Монгол оронд маш хэрэгтэй санагдсан нэг зүйл бол эрчим хүчний хэмнэлттэй орон сууц юм. Passivе house хэмээх энэхүү барилгын гайхалтай давуу тал нь эрчим хүчний жилийн хэрэглээг байшингийн 1 куб талбайд ердөө 15 килловат болтол бууруулж чадсан байхад манай улсын хувьд энэ хэмжээний талбайг 365 киловат зарцуулдаг байна.

Үзэсгэлэнгийн үеэр ч оюутнууд суралцаж байлаа
 

Түүнчлэн хойч үе болсон барилгын мэргэжилтэн бэлтгэх тал дээр хэрхэн анхаарч буй нь сонирхол татсан юм. Бүхэл бүтэн үзэсгэлэнгийн нэг танхимд энэ чиглэлийн мэргэжилтэй болох хүсэлтэй залуусыг бүртгэх, зааж сургах ажлыг зохион байгуулсан байлаа. Манай аяллын бүрэлдэхүүний хувьд Герман улсын барилгын материал, тоног төхөөрөмжийг судлах, боломжит бараа бүтээгдэхүүнийг Монгол улсад оруулж ирэх зорилготой байв.

      Аяллын удаах өдөр Прага хотод хүрэлцэн ирж Бүгд Найрамдах Чех улсын барилгын  бизнес эрхлэгчдийн холбоотой уулзалт хийв. Тус улстай харилцах бизнесийн харилцаа нь манай улс сүүлийн 10-аад жилд  үндсэндээ зогсонги байдалд орсон байсан бөгөөд энэхүү уулзалтын үр дүнд хоёр орон цаашид хамтарч ажиллах ямар боломж нөхцөл байгааг судлах, үр ашигтай ажиллаж болох талаар хэлэлцлээ. Аяллын багийн зарим гишүүд ч 4 сард Чех улсад зохиогдох олон улсын үзэсгэлэнг үзэх шийдэлд хүрэв.

Чехд хийсэн уулзалтын үеэр
 

Нийт 8 хоног үргэлжилсэн бизнес аяллын үр дүнд багийнхан Монголд ирсний дараа ч хамтарч ажиллах, санал солилцох, дараа дараагийн аялалд оролцох талаар ярилцсан нь зохион байгуулагч бидний ажилд ихээхэн урам зориг хайрласан билээ.