/03-р сарын 06-ны өдөр "Барилга Зөвлөгөө мэдээллийн төв"-с "Барилга-Дэвшилтэт технологи семинар зохион байгуулсан. Уг семинарт оролцсон байгууллагуудын шинэлэг, дэвшилтэт техник технологиудыг цувралаар танилцуулж байна./
“Барилга-Дэвшилтэт технолгоги” семинарын үеэр өөрсдийн шинэлэг техник технологийг танилцуулсан байгууллагуудын нэг болох “United Top Assets’’ групп барилга орон сууцны авто зогсоолыг хамгийн зөв хувилбараар шийдэх боломж байгааг хэлээд “Эко-авто зогсоол”-ын барилга манайд нэвтрүүлж байгааг танилцуулав. Энэ үеэр тус группын гүйцэтгэх захирал, төслийн удирдагч Г.Пүрэвжавтай цөөн хором ярилцлаа.

• Эко авто зогсоолыг Монголдоо нэвтрүүлэхийн тулд судалгааг хэр хугацаанд хийсэн бэ?

Өнөөдөр Улаанбаатар хотод нэн тулгамдсан байгаа асуудлуудын нэг нь авто зогсоол. Манай группын зүгээс олон улсад амжилттай туршигдсан бүрэн автоматжсан “Эко авто зогсоол”-ыг танилцуулж байна. Хоёр жилийн хугацаанд судалгаа шинжилгээ хийгдсний үндсэн дээр энэ төслөө эхлүүлсэн. Одоогоор Хан-Уул дүүргийн 2-р хороооны нутаг дэвсгэр дээр ойр хавийн оршин суугчдаас судалгаа санал авсан. Үүн дээр үндэслэн  эхний ээлжийн 64 авто машины загвар авто зогсоол барихаар болсон.

• “Эко авто зогсоол”-ын барилгын техник, тоног төхөөрөмжийг хаанаас авч байгаа вэ?

Манай компани 100 хувь Монголын хөрөнгө оруулалттай, Солонгос улсын “Самсунг Корпораци”-ийн охин компани “Самжунг” компанийн техник тоног төхөөрөмжөөр тоноглоно. Түүнчлэн бид өөрсдийн инженер техникийн ажилчдыг Солонгос улсад сургасан.

• “Барилга-Дэвшилтэт технологи” семинарт оролцогчид танай авто зогсоолын барилгыг хэр сонирхож байна?

Барилгын олон компаниудын төлөөлөл сонирхож байна. Бид хэд хэдэн семинар дээр очиж энэхүү “Эко авто зогсоол”-ын барилгаа танилцуулахад хүмүүс их сонирхсон. Сүүлийн үеийн орон сууцнуудын нэн тэргүүнд шийдэх асуудал нь авто зогсоол болоод байна. Тиймээс бид барилгын компаниудтай хамтран ажиллахад бэлэн байна.
 Нийслэлийн хэмжээнд нийтийн эзэмшлийн зам талбай, ногоон байгууламжийг нэмээд, авто зогсоолын хүндрэл бэрхшээлийг шийдвэрлээд эхэлбэл манай компанийн зүгээс энэхүү авто зогсоолын барилгын технологийн үйлдвэрийг байгуулах боломжтой. Бидний зүгээс загвар авто зогсоолын барилгыг  сайн барихыг хичээж байна.