Төв аймгийн Эрдэнэ сумын нутагт үйл ажиллагаа явуулж буй “Алтайн түрүү” ХХК нь байгалийн чулуу боловсруулж байгаа анхдагч үйлдвэрүүдийн нэг. Тус компанийхан газрын хөрсөн дор байгаа өнгөлгөөний боржин чулууг олборлож бүтээгдэхүүнээ үйлдвэрлэдэг. Энэхүү чулуу нь барилгын бүх төрлийн засал чимэглэлд тохирдог, импортыг орлох бүтээгдэхүүн юм байна. “Алтай түрүүн” ХХК-ийнхан үндэсний барилгын компанийхантай хамтран ажиллаж эхэлсэн талаараа салбарын сайддаа дуулгав. Хоногт 125 мкв чулуу боловсруулж байна. Цаашид нөөц дээрээ тулгуурлаад үйлдвэрлэлээ нэмэгдүүлэх, эргэлтийн хөрөнгийн дэмжлэг авах төлөвлөгөөтэй гэж байна. Ингэж чадвал дотоодын хэрэгцээний 30 хувийг зөвхөн энэ компани дангаараа нийлүүлэх бололцоо бий гэв. 
 

Дараа нь сайд Багануур дүүргээс 4 км зайтай орших “Монгол стандарт” компанийн Цувраа толгой дахь элс хайрганы орд дээр очлоо. Энэ ордын дайргаар нарны замыг тавьсан юм байна. Зөвхөн зам гэлтгүй өндөр барилгад тохирох сайн чанарын түүхий эд энэ ордод байна. Нийслэлтэй ойролцоо хайрга, дайрганы ордууд ой усны сав газар байрладаг бол Цувраа толгойн орд ой, уснаас хол, дээр нь төмөр замтай ойр учраас тээвэрлэлтийн асуудлыг хялбар шийдэж болно. Хатуулгийн зэргээр 8, энэ чулуугаар төмөр замын бетон, өндөр барилгын бетон эдлэл хийхэд тохиромжтой юм байна. 

Багануур дүүрэгт үйл ажиллагаа эрхэлдэг Монгол Хятадын хамтарсан ган төмөрлөгийн “Дөл түшиг” ХХК-ийн ажил байдалтай мөн танилцлаа. 2008 оноос үйлдвэрлэлээ эхэлсэн тус компани Катанг төмөр утас үйлдвэрлэдэг анхны ган төмөрлөгийн үйлдвэр юм байна. Жилдээ 40-45 мянган тонн цувимал бүтээгдэхүүн үйлдвэрлэх хүчин чадалтай анх байгуулагдаж байсан. Монгол улсад барилгын салбар эрчимтэй хөгжиж байгаа учраас үйлдвэрээ өргөтгөх төсөл боловсруулжээ. Үүний тулд хятадаас ажилчин авах шаардлагатай байгаа. 150 ажилчин авбал 2 жил дотор үйлдвэр барьж дуусгана. Энэ тал дээр тусламж дэмжлэг үзүүлэхийг хүслээ. 
 
Сайд Ц.Баярсайхан барилгын салбарынханы хувьд улирал, импортын хамаарлаас гарах, дотоодын үйлдвэрлэлийг дэмжих, ялангуяа импортыг орлох, цаашдаа экспортыг хангах, дотоодын хэрэгцээг бүрэн хангахад чиглэсэн материалын үйлдвэрлэлийг дэмжинэ. Тийм ч учраас материалын үйлдвэрийг дэмжих хөтөлбөрийг өнгөрсөн онд гаргасан. Монгол банктай хамтарч хэрэгжүүлсэн хөтөлбөрийн хүрээнд эргэлтийн хөрөнгөөр барилгын материалын үйлдвэрүүдийг дэмжлээ. 60 гаруй аж ахуй нэгж 170-аад тэрбум төгрөгийн хөнгөлөлттэй зээл авсан байгаа. 

  

Өнгөрсөн жилийн тухайд яамнаас хэрэгжүүлсэн энэхүү бодлогын үр дүнд л гэхэд 160-аад үйлдвэр шинээр байгуулагдлаа. Энэ жилийн тухайд үйлдвэржилтийг дэмжих бодлогын хүрээнд 50 гаруй төсөл явж байгаа. Цемент, арматур, угсармал барилгын үйлдвэрийн төсөл, түүнчлэн барилгын ханын материалын үйлдвэрийн төсөл байна. Тэгэхээр ийм үйлдвэрүүдтэй болсноор дээр хэлсэнчлэн импортын хамаарлаас гарах үүд хаалга нээгдэнэ гэв. Барилгын яамнаас дотоодын барилгын материалын үйлдвэрүүдээ дэмжих бодлогын дагуу сайд Ц.Баярсайхан дээрхи үйлдвэрүүдийн үйл ажиллагаа, нөхцөл байдалтай танилцаж, дэмжлэг үзүүлэх боломж нөхцлийг судлав.