“ITGM” ХХК-ийн Ерөнхий инженер Б.Мөнхбаатартай ярилцлаа .
 
- Таны бодлоор өнгөрсөн онд барилгын салбарт дорвитой шинэчлэл хийгдсэн үү?
- Хийгдээгүй гэж хэлнэ. Барилгын салбарын шинэчлэл гэхээсээ цаг үеийн асуудлаас шалтгаалсан арга хэмжээнүүд авагдсан гэж үздэг.
- Шинэчлэл хэрэгтэй гэж ярьж байгаа ч яг юуг нь яаж шинэчлэх шаардлагатай талаар тодруулж яриач?
- Хууль эрх зүйн, стандарт, норм дүрмийн, хүний нөөцийн, технологийн, менежментийн, мэдээлэлжүүлэх гээд л маш олон шинэчлэл энэ цаг үед шаардлагатай байна. Мэдээж эхнээсээ хийгдээд эхэлж байна. Алга урвуулахын хооронд хийнэ гэхэд хэцүү. Гэхдээ маш удаан байна, зоригтой шийдвэрүүд гарахгүй байна, Төрийн залгамж халаа дутагдаж байна. Цаашдаа энэ байдлаараа явбал ер нь салбар хариуцсан яам, бодлого хариуцсан төрийн байгууллагууд байх хэрэггүй ч юм шиг сүүлийн үед  санагдах болсон.
- Төрийн зарим чиг үүргийг мэргэжлийн төрийн бус байгууллагаар гүйцэтгүүлэх тухай салбарын сайд ажлаа анх авсан үеэсээ л амласан. Гэвч энэ ажил урагшлахгүй байгаа нь юутай холбоотой вэ?
- Барилгын салбарын мэргэжлийн төрийн бус байгууллагуудын цаг нь болоогүй байна гэж тайлбарладаг юм билээ. Цаг нь болсон эсэхийг бид яаж тодорхойлж мэдэх вэ? гэдэг бас их сонин асуудал. Батаа ажлаа өгөх дургүйдээ Баатарт ямар нэгэн шалтаг гаргаж хэлээд байгаа юм шиг харагддаг, ойлгогддог. Нөгөөтэйгүүр төрийн бус байгууллагууд гэж бас хэн бэ? Чухам хэн нь ажлаа хийж байна вэ? гэдгийг бас нийтээрээ шүүж дүгнээд чаддагууддаа ачаа үүрүүлэх хэрэгтэй байх. Тэрнээс биш шоу хийсэн ганц хоёр хүн ч бий.
- Тусгай зөвшөөрлийг төрийн байгууллага гаргадаг байтал тусгай зөвшөөрөл гаргаж өгнө, зарна гэсэн зар яваад байх юм. Энэ юутай холбоотой вэ?
- Би хувьдаа тийм зар олж үзээгүй. Энэ тал дээр Барилгын хөгжлийн төв харин ч шуурхай, ахицтай ажиллаж байгаа гэж үздэг.
- Барилгын салбарт зөвлөх үйлчилгээг нэвтрүүлсний ач холбогдол нь юу байх вэ?
- Энэ бол бидний явах ёстой зам. Тийм учраас ач холбогдол байгаа л гэсэн үг. Хуулиндаа тусгачихлаа, дүрмээ гаргачихлаа. Тэгээд л байдаггүй. Сураг сонсохнээ яамны нэг мэргэжилтэн дээр л дарагдсан сураг байдаг юм билээ. Зүгээр салбараа үзэн ядаад ч юмуу, ажлаа хийдэггүйдээ дарсан гэж ойлгохгүй байгаа. Бас л нэг хуулийн зохицуулалт, журмаа эхлээд шинэчлэх, сайжруулах шаардлага гарсан биз. Гэхдээ л сургийг нь сонсоод 3 жил болчихлоо, одоо нэг юм дуулгамаар даа.
- Барилгын салбарыг зөв голдрилоор хөгжүүлэхийн тулд мэргэжлийн ТББ-уудын зүгээс ямар ажлыг зохион байгуулж байна вэ? Цаашид ямар арга хэмжээ авах шаардлагатай вэ?
- Би өөрөө ямар нэгэн ТББ-д харъяалагддагүй хүн. Тиймээс тэдний хийж буй үйл ажиллагааг хөндлөнгөөс л хардаг. Зарим тохиолдолд харахтай манатай завгүй явдаг хүн. Гэхдээ хэн нь нэг үзэгдэж дуулдаад алга болчихдог хэн нь байнга ямар нэгэн зүйл хийгээд яваад байгааг гадарлахын хувьд цаашид нэгдэж, аль болох олон үзэл бодол, олон дуу хоолойг оруулж өгөөсэй гэж боддог. 5 компани нийлж байгуулсан ТББ-ийн дуу хоолой хол явах уу? 500 компаний эрх ашгийг нийлүүлсэн байгууллага нь хол бас үнэнд ойр явах уу гэдэг нь хэнд ч ойлгомжтой байх.
- Ярилцсанд баярлалаа