Засгийн газраас баталсан жагсаалтын дагуу 2014 онд 8 яамны хариуцсан 85 төрлийн барилга байгууламжид хүчин чадал, газар зүйн байрлал, ашиглах материалаас нь хамаарсан ялгаа бүхий 129 зураг төсөл боловсруулах ёстой бөгөөд одоогийн байдлаар ажлын нийт гүйцэтгэл 90 шахам хувьтай байгаа аж. Дуусаагүй байгаа зураг төслүүдийг 2 дугаар сарын 15-ны дотор багтааж бэлэн болгох гэнэ.

          Бэлэн болсон зураг төслийг экспертизээр батлуулсны дараа тухайн ажлын төсөв санхүүгийн эрхийг нь нээж, тендер зарлах юм байна. Өнгөрсөн хугацаанд барьсан сургууль, цэцэрлэг, эмнэлэг, соёлын төвийн барилгуудын инженерийн шугам сүлжээ хэт үрэлгэн байсныг албаныхан шүүмжлээд энэ жилээс нийгмийн үйлчилгээний барилгуудыг нэг хэв маягийн Техник, эдийн засгийн үндэслэл, зураг төслөөр барихаар болжээ. Энэ  нь цаг хугацаа, хөрөнгө мөнгө хэмнэхээс гадна ажлын чанарыг сайжруулж, байгаль орчинд ээлтэй барилга байгууламж барих боломжийг бүрдүүлэх гэнэ.

          Ирэх 4 жилийн хугацаанд улсын төсвийн хөрөнгө оруулалтаар 2905 барилга байгууламж баригдах бөгөөд  барилга бүрийн зургийг нэгбүрчлэн өөрөөргаргадаг байсан өмнөх жишгээр тооцвол зураг төсөлд л гэхэд 61.5 тэрбум төгрөг зарцуулагдах ажээ. Харин сургууль, цэцэрлэг, эмнэлэг, соёлын төв, захиргаа, станц гэх мэт нийгмийн үйлчилгээний барилга объёктуудыг нэг маягийн зургаар баривал дээрх тооны барилгад нэг маягийн 129 загвар зураг, 6.2 тэрбум төгрөг л хангалттай гэнэ.