Мэргэжлийн Хяналтын Ерөнхий Газраас  Хот суурин газрын цэвэрлэх байгууламжийн үйл ажиллагаанд хяналт шалгалт явуулжээ. Нийт 46 байгууламж шалгалтад хамрагдсанаас  нэг нь ч стандартын шаардлага хангаагүй нь тогтоогджээ. Өөрөөр хэлбэл, улсын хэмжээнд ажиллаж байгаа  нийт цэвэрлэх байгууламжууд усыг бүрэн гүйцэд цэвэрлэдэггүй байна. Хяналт шалгалтад хамрагдсан ахуйн бохир ус цэвэрлэх 46 байгууламжийн 39 хувь нь 1981-1990 онд, 11 хувь нь 1961-1970 оноос хойш ашиглалтад орсон аж.
         Нийслэлийн хэмжээнд үйл ажиллагаа явуулж буй ахуйн бохир ус цэвэрлэх томоохон найман байгууламжийн хүчин чадал, ашиглалтын хугацааг судлахад ихэнх байгууламжууд хоногт цэвэрлэх ёстой хэмжээнээс илүү  бохир усыг хүлээн авч цэвэрлэдэг болох нь тогтоогджээ.
         Улаанбаатар хотын ахуйн бохир ус цэвэрлэх байгууламжуудаас гарсан ус  бүрэн цэвэрлэгддэггүйгээс Туул голын усны бохирдлын түвшин нэмэгдэж байгаа аж.  Харин аймгуудын бохир усыг хаядаг орчны хөрс гэдэсний бүлгийн нянгаар бохирдсон байгаа нь хүн амын эрүүл мэндэд сөргөөр нөлөөлөх түвшинд хэдийнээ хүрсэн байна.

            Цаашид эдгээр асуудлыг шийдэж шинээр бохир ус цэвэршүүлэх байгууламж барих шаардлагатай. Харин энэ ажилд хөрөнгө мөнгө, цаг хугацаа ихээхэн зарцуулна гэж МХЕГ мэдэгдлээ.