Барилгын ажил эхлүүлэх, үргэлжүүлэх зөвшөөрөл олгох ажлыг хөнгөвчлөх, нэг цэгийн үйлчилгээнд шилжүүлэх ажлыг нийслэлээс өнгөрсөн оны 12 сараас хэрэгжүүлж эхэлсэн. Энэхүү ажлыг дүгнэж, ирэх онд  хэрэгжүүлэх ажлын төлөвлөгөөгөө батлах зорилгоор “Барилгын зөвшөөрөл 2014 онд” хэлэлцүүлгийг нийслэлийн Засаг даргын тамгын газар, АНУ-ын Олон Улсын хөгжлийн Агентлагийн “Бизнесийг дэмжих санаачилга төсөл”-тэй хамтран зохион байгууллаа.

          Хэлэлцүүлэгт нийслэлийн удирдлагууд, олон улсын болон холбогдох мэргэжлийн байгууллагууд, хувийн хэвшлийн төлөөлөл оролцсон.  Урьд нь барилгын ажил эхлүүлэх, үргэлжлүүлэх зөвшөөрөлолгохдоо 180 гарын үсэг цуглуулан,2-3 сарын хугацаанд шийдвэрлэдэг байсан бол нийслэлийн Иргэд хүлээн авах төвөөр дамжуулан барилга барихыг хүссэн өргөдөл, хүсэлтийг хүлээн авдаг болсноор барилга угсралтын ажил эхлүүлэх зөвшөөрлийг 18 гарын үсэг цуглуулан, 21-30 хоногт багтаан шийдвэрлэдэг болсон байна.       

           2012 онд барилгынажил эхлүүлэх  430 зөвшөөрөл олгож байсан бол энэ оны 11 сарын байдлаар энэ төрлийн 736 зөвшөөрөл олгосон байна. Энэ нь өмнөх оны гүйцэтгэлтэй харьцуулахад 40 хувиар өссөн үзүүлэлт аж.  “Бизнес эрхлэхүй 2014” судалгааны “Барилгын зөвшөөрөл авах” шалгуур үзүүлэлтээр судалгаанд хамрагдсан 189 орноос Монгол Улс 107 дугаар байрт орж, энэ оны тайлангаас 25 байраар ахижээ.

           Хэдийгээр энэ ажил үр дүнгээ өгч байгаа ч Иргэд хүлээн авах төвөөр дамжуулан явуулсан судалгаагаар барилга барих, барилгын ажил эхлүүлэх, үргэлжлүүлэх зөвшөөрөл авах, ашиглалтад өгөх үйл явц ямар нэг хэмжээгээр хүндрэл, чирэгдэлтэй хэвээр байгааг барилгын салбарынхан шүүмжилсээр байгаа юм.  Тэгэхээр энэ ажлыг илүү хөнгөвчлөх, хялбаршуулах шаардлага байгааг албаны хүмүүс онцлов. Ингэхийн тулд ирэх онд барилгын зөвшөөрөл олгох ажлын хүрээнд олон шинэчлэл хийнэ гэжхотын дарга Э.Бат-Үүл хэллээ. Мөн тэрээр: “Бид барилгын зөвшөөрөлтэй холбоотой асуудлаа нэг цонхны үйлчилгээгээр шийдвэрлэдэг, мэдээллээ ил тод болгосноор авлига хүнд суртлыг багасгаж, төрийн үйлчилгээнд тодорхой хэмжээнд ахиц гарсан. Гэхдээ барилгын компаниуд ямар ч албан ёсны зөвшөөрөлгүйгээр барилгын ажил эхлүүлэх, нийтийн эзэмшлийн зам талбайд, орон сууцны суурийг хөндөж барилга барих ноцтой зөрчлүүд гаргасаар байна. Зөвшөөрөл авах ажлыг хөнгөвчилөн түргэн шуурхай болгосоор байхад энэ мэт ёс зүйгүй байдал гаргаж байгаа этгээдүүдтэй хатуу ярихаас өөр аргагүй. Бид иргэдээ хүндэтгэдэг, иргэдийн эд хөрөнгийг үнэ цэнэтэй байлгахын тулд барилга барих зөвшөөрлийг олгохдоо тухайн хэсэгт оршин суух иргэдээс заавал зөвшөөрөл авдаг байхаар шинэ журам боловсруулж байна. Энэ нь иргэдийн үндсэн хуулиар баталгаажсан эрүүл, аюулгүй орчинд амьдрах эрхийг баталгаажуулж, өмчийг нь хамгаалах нэгэн томоохон шийдвэр болох юм. Өнөөдөр та бидний уулзаж байгаа нь барилыг зөвшөөрөлтэй холбоотой эрх зүйн орчин, шинээр боловсруулах дүрэм журамд та бүхний санал бодлыг нэтгэх зорилготой юм. Цаашид бид онлайнаар барилга, газартай холбоотой асуудлыг шийдвэрлэдэг тогтолцоо нэвтрүүлэхээр төлөвлөгөө боловсруулан ажиллаж байна” гэлээ.

         Түүнчлэн барилгын компаниуд техникийн нөхцөлөө авахын тулд УСУГ, цахилгаан, дулааны газруудаар эргэлдэхгүй, зөвхөн орон сууцны конторууд энэ эрхийг нь дангаараа олгодог болох гэнэ. Мөн хууль эрх зүйн орчныг ч шинэчлэх шаардлагатай байгаа юм.

.