Нийслэлийн ИТХ-ын ээлжит хуралдаанаар 2014 оны нийслэлийн эдийн засаг, нийгмийн зорилтыг баталлаа.Нийслэлийн эдийн засаг, нийгмийн 2014 оны зорилтын төслийг Монгол Улсын Их Хурлын 2013 оны 23 дугаар тогтоолоор батлагдсан “Улаанбаатар хотыг 2020 он хүртэл хөгжүүлэх ерөнхий төлөвлөгөөний  тодотгол,  2030 он хүртэлх хөгжлийн чиг хандлагын баримт бичиг”-ийг баримталж, нийслэлийн 2014 оны төсвийн хөрөнгө оруулалтын төлөвлөгөөний төсөл, бусад холбогдох бодлогын баримт бичгүүдтэй уялдуулан боловсруулжээ.

       2014 онд Агаар цэвэр Улаанбаатар, Амины сууцтай Улаанбаатар, Ажилтай орлоготой Улаанбаатар, Аюулгүй, амгалан Улаанбаатар, Авлигагүй Улаанбаатар гэсэн 5А зорилтын хүрээнд 23 чиглэл, 123 заалт, нийт 338 үйл ажиллагааг хэрэгжүүлэхээр төлөвлөөд байна.

Томоохон ажлуудаас 5А зорилт тус бүрээр товчхон танилцуулахад:

Нэг. Агаар цэвэр Улаанбаатарзорилтын хүрээнд: Нийт 4 чиглэл, 24 заалтаар 60 үйл ажиллагааг хэрэгжүүлэхээр тусгасан.

-Улаанбаатар хотын хөрс, орчны бохирдлыг бууруулах чиглэлээр хотод болон алслагдсан 3 дүүрэгт бага оврын хог боловсруулах үйлдвэрийг хувийн хэвшилтэй хамтран байгуулах, байгаль орчин болон иргэдийн амьдрах орчинд сөрөг нөлөө үзүүлж буй зарим үйлдвэрүүдийн үйл ажиллагааг зогсоох, хотоос нүүлгэн шилжүүлэх

-Үндэсний цэцэрлэгт хүрээлэн, Туул, Сэлбэ, Дунд голын дагуу амралт, зугаалгын бүс байгуулж, тохижуулах

-Улаанбаатар хотын хэмжээнд 360 мянган м.кв сул шороон хөрстэй талбай байгаагаас ирэх онд 67 мянган м.кв талбайг хатуу хучилттай болгохоор төлөвлөсөн.
 Хоёр. Амины сууцтай Улаанбаатар зорилтын хүрээнд: Нийт 5 чиглэл, 19 заалтаар 71 үйл ажиллагааг хэрэгжүүлэхээр тусгасан.

- 2014 онд Улаанбаатар хотын дагуул, хаяа хот, тосгодыг хөгжүүлэх бодлогын хүрээнд Багануур, Багахангай, Налайх дүүргийн ерөнхий төлөвлөгөө, Био-комбинат, Туул-Шувуун фабрик орчмыг хөгжүүлэх ерөнхий төлөвлөгөөг батлуулж, Аргалант-Эмээлт хотын ерөнхий төлөвлөгөөг шинээр боловсруулна.
- 2014 онд гэр хорооллын дахин төлөвлөлтээр хийгдэж буй эхний ээлжийн барилгажилт, инженерийн дэд бүтцийг барих ажлыг үргэлжлүүлж, 2-р ээлжийн барилгажилтын 8 байршлын хэсэгчилсэн ерөнхий төлөвлөгөө, инженерийн шугам сүлжээний зураг төслийг боловсруулж хэрэгжүүлж эхэлнэ. 2-р ээлжийн барилгажилтын ажлыг эхлүүлснээр нийт 344 га талбайд 100 гаруй мянган хүн амын орон сууцжуулах боломжийг бүрдүүлэх юм.Мөн газар шинэчлэн зохион байгуулах төслийг боловсруулж, төсөл сонгон шалгаруулах замаар үргэлжлүүлэн хэрэгжүүлнэ.

- Гэр бүлийн хэрэгцээний зориулалтаар иргэнд өмчлүүлэх 15309 га бүхий 52 газрын байр зүйн зураг, хэсэгчилсэн ерөнхий төлөвлөгөөг боловсруулж, нийслэлийн иргэдэд өмчлүүлнэ. 

- Монгол Улсын Засгийн газар АХБ-ны 320 сая ам.долларын зээлийн хөрөнгөөр “Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр”-ийг хэрэгжүүлэхээр ажиллана.2014 онд төслийн ажлыг эхлүүлж, эхний ээлжинд хотын Баянхошуу, Сэлбэ дэд төвүүдийн төлөвлөлт, барилгажилтын ажлыг эхлүүлэх зорилт тавиад байна.
 Гурав. Ажилтай, орлоготой Улаанбаатар зорилтын хүрээнд: 10 чиглэл, 31 заалтаар 79 үйл ажиллагааг хэрэгжүүлэхээр тусгасан.

-2014 онд нийслэлийн төсвөөс 15,2 тэрбум төгрөгийн бичил зээлийн санг шинээр бий болгож, нийслэлийн иргэдийн амьжиргааны нөхцлийг дээшлүүлэх, орлого нэмэгдүүлэх зорилгоор олгож эхлэхээр төлөвлөөд байна. 2014 онд 20,000 шинэ ажлын байр бий болгож, 40,000 иргэнийг байнгын болон түр ажлын байраар хангах зорилтыг тавьж байна.Ажил, мэргэжилгүй 12,000 иргэнийг мэргэжлийн болон давтан сургалтанд хамруулна.Нийслэлийн Засаг даргын үйл ажиллагаанд тусгагдсан үйлдвэрлэл, үйлчилгээг жижиг, дунд үйлдвэрийн сангаар дамжуулан дэмжиж ажиллахаар 5 тэрбум төгрөгийг нийслэлийн төсөвт тусгаад байна.
-Аялал, жуулчлалын салбарыг хөгжүүлэх чиглэлээр тухайн салбарт ажлын байр нэмэгдүүлэх, үндэсний брэнд бүтээгдэхүүний үйлдвэрлэлийг дэмжих, гадаадын болон дотоодын аялал, жуулчлалыг хөгжүүлэх үүднээс Байгалийн аялал жуулчлалын жишиг суурин бий болгох, Хүй долоо худаг дахь “Монгол наадам цогцолбор”-ын бүтээн байгуулалтын ажлыг эхлүүлнэ. 
- “Иргэний оролцоотой төсөв” батлах ажлыг тогтмолжуулан, нийслэлийн 9 дүүргийн 152 хороодын иргэдээс санал, асуулга, хэлэлцүүлгийг зохион байгуулж хэрэгжүүлнэ.

Дөрөв. Аюулгүй, амгалан Улаанбаатар зорилтын хүрээнд: Нийт 4 чиглэл, 34 заалтаар 83 үйл ажиллагааг хэрэгжүүлэхээр тусгасан.

-2014 онд нийслэлд шинээр баригдах авто замын ажлыг Монгол Улсын Хөгжлийн банкны санхүүжилтээр хийхээр төлөвлөж байна. Нийслэлийн төсвөөр авто замын засварын нийт 32 төсөл, арга хэмжээ, нийтийн тээврийн үйлчилгээний хүртээмжийг нэмэгдүүлэх, парк шинэчлэх, техник хяналтын үзлэгийн тоног төхөөрөмжийг шинэчлэхээр 3 төсөл, арга хэмжээг төлөвлөсөн.
-Дүүрэг, хороодын иргэдээс авсан санал, асуулга, амьдрах орчны зураглалын дагуу хотын захын хороодыг камержуулах, гэрэлтүүлэх ажлыг дүүргүүдэд шилжүүлж, орон нутгийн хөгжлийн сангийн хөрөнгөөр гүйцэтгүүлэхээр боллоо.
 Тав. Авилгагүй Улаанбаатар зорилтын хүрээнд: Нийт 15 заалт, 45 үйл ажиллагааг хэрэгжүүлэхээр тусгасан.

-2014 онд иргэдийн оролцоотой, ил тод, хөнгөн шуурхай, хараат бус, цахим засаглалыг бататган сайжруулж, хэвшүүлэн ажиллана.

-2013 онд Улаанбаатар хотыг дүрэмтэй болгох ажлыг эхлүүлсэн бөгөөд ирэх онд Улаанбаатар хотын 25 багц дүрмийг иргэдийн оролцоотой боловсруулан НИТХ-д өргөн барина.

-Нийслэлийн Засаг даргын эрхлэх ажлын хүрээнд олгож буй аж ахуйн үйл ажиллагааны тусгай зөвшөөрөл, тусгай зөвшөөрлийн тогтолцоог стандартчлалтай уялдуулж, үйл ажиллагааг иргэдэд нээлттэй, ил тод болгоно.
-Нийслэлийн нутгийн захиргааны байгууллагуудаас иргэдэд үзүүлдэг үйлчилгээг ил тод, нээлттэй болгон төрийн үйлчилгээг цахим хэлбэрт үе шаттайгаар шилжүүлэн, цахим засаглал “Ухаалаг Улаанбаатар”-ыг хөгжүүлэх зэрэг томоохон ажлуудыг хэрэгжүүлэхээр төлөвлөжээ.
          Нийслэлийн нийгэм, эдийн 2014 оны зорилтод тусгагдсан томоохон төсөл, хөтөлбөрүүдийг хэрэгжүүлэх хөрөнгө оруулалтыг нийслэлийн ирэх оны төсөвт тусган баталсан бөгөөд дээрх ажлуудаас иргэд 2014 онд гэрээсээ төрийн үйлчилгээг ямар ч саад, хүнд сурталгүйгээр авах боломжийг бүрдүүлэх “Ухаалаг Улаанбаатар” цахим засаглалын төслийг нийслэлийн Засаг дарга онцолж байна. Монгол Улсын Ерөнхийлөгчийн өнгөрсөн сард зохион байгуулсан “Том төрөөс Ухаалаг төр лүү” чуулганы үндсэн чиглэл, уриалга ч энэ ажлын зорилготой нийцэж байгаа аж. Нийслэл “Ухаалаг Улаанбаатар”-ыг бий болгож, төр нь иргэддээ жинхэнэ утгаараа үйлчлэх боломжийг бүрдүүлэхийн тулд ирэх онд томоохон зорилт тавин ажиллахаар болжээ.