Барилга барина гэдэг дурын мөнгөтэй хүний хийдэг ажил болжээ. Хэдэн айлын орон сууц, оффисын өндөр барилга барьж  зараад мөнгө олж байвал хүүхдүүд  тоглоомын талбайгүй үлдэнэ үү, оршин суугчид нар үзэх эрхээ хязгаарлуулж харанхуй хана ширтэнэ үү тэдэнд ердөө падгүй.  Улаанбаатар хотод нийтийн эзэмшлийн талбайд дураараа барьсан, орон сууцны айлуудын цонхыг хаасан барилгууд ар араасаа нэмэгдсээр л байна. Саяхан хотын захирагч Э.Бат-Үүл иргэдтэй хийсэн нээлттэй хэлэлцүүлэг дээр “Нийслэлийн удирдлагаас газар, барилга тойрсон хүнд суртал, авлигыг халж аливаа асуудлыг иргэдийн оролцоотой шийдвэрлэдэг шинэ тогтолцоо руу орж байна. Өмнө нь хөрөнгө мөнгөтэй, эрх мэдэлтэй хүмүүс хотын хаана ч хамаагүй хүссэн хэсэгтээ газар эзэмшиж, барилга барьдаг байсан бол бид үүнийг өөрчилж, иргэдэд газраа эзэмших, өмчлөх эрхийг тэгш олгохоор шийдвэрлэсэн” хэмээн мэдэгдсэн. Харин энэ шийдвэр нь хэр бодитойгоор  хэрэгжихийг цаг хугацаа харуулах биз ээ.

    Бидний сурвалжилсан эхний асуудал дагуулсан барилга бол Баянгол дүүргийн 10-р хороонд баригдаж буй Субару компаний оффисын барилга юм. Энэ барилга нь саяхан ашиглалтанд орсон Дако констракшны 274 айлын орон сууцны наран талд баригдаж буй учир тус байрны оршин суугчид өдрийн нар үзэх эрхээ хасуулаад байгаа аж. Уг оффисын барилга нь Дако констракшны орон сууцны барилга баригдаж эхэлсэн хойно барилга угсралтын ажлаа эхэлсэн учир Дакод наран талдаа цонхтой өрөө захиалсан иргэд одоо яах учраа олохгүй дэмий л хулхидуулчлаа хэмээн амаа барьж байгаа гэнэ.

   Өөр нэг асуудалтай барилга бол Хүмүүнлэгийн ухааны их сургуулийн өргөтгөлийн барилга. Тус барилгын ажлыг Пума констракшн гүйцэтгэж байгаа юм. Өргөтгөлийн барилгыг сургуулийн хуучин байртай нийлүүлээд барьчихсан учир гадна өнгөлгөөг яаж хийхийг мэдэх аргагүй юм билээ.

    Асуудал дагуулсан барилгын нэг нь Урт цагааны хойно Сүмбэр цамхаг ХХК-ий барьж буй 10 давхар орон сууцны барилга юм. Тус барилгыг маш олон хууль, тогтоомж зөрчин барьж байна хэмээн Чингэлтэй дүүргийн III хорооны “Гэгээн өргөө” СӨХболон Урт цагаан худалдааны төвийн түрээслэгчид хэвлэлийн хурал хийн мэдэгдсэний дараа тус барилгын ажлыг зогсоосон юм.

Бэлтгэсэн: Б.Цолмонтуяа