Сүүлийн үед Улаанбаатар хотод зөвшөөрөлгүй барилга баригдаж байна гэсэн гомдол ихээр гарах болсон. Тэгвэл барилгын зөвшөөрөлтэй холбоотой мэдээллийг олон нийтэд  ил тод болгож,  авлига, хүнд суртлыг багасгаж, төрийн үйлчилгээнд ахиц гаргах гэнэ.

           Барилгын компаниуд албан ёсны зөвшөөрөлгүй барилгын ажил эхлүүлж, нийтийн эзэмшлийн зам талбайг хумслах, орон сууцны суурийг хөндөх зэрэг ноцтой зөрчлүүд гарсаар байгаа билээ. Харин ирэх жилээс эдгээр зөрчлийг иргэдийн тусламжтайгаар арилгана гэж Хотын дарга мэдэгдсэн.

         Өнгөрсөн 11 сард хотын удирдлагууд Мобиком корпорацитай хийсэн уулзалтын үеэр зөвшөөрөлгүй барьж байгаа барилгын ажлыг хянах, илрүүлэх техникийн шийдлийг олох хүсэлтийг Мобиком корпорацид тавьсан байна.
Саяхан болсон “Барилгын зөвшөөрөл 2014 онд” хэлэлцүүлэг дээр Мобиком Корпорацийн гүйцэтгэх захирал Дэвид Холлидэй нь дээрх хүсэлтийн хариу болох шийдэл бүхий аппликейшн олсон гэдгээ мэдэгдлээ.

          Тэрээр хэлэхдээ: ‘‘Бидний мэдэхээр энэ төрлийн шийдлийг нэвтрүүлэх нь Улаанбаатар хотын захиргаанд анх удаагаа төдийгүй дэлхийд анх удаа иргэд ухаалаг гар утас ашиглан зөвшөөрөлгүй баригдаж байгаа барилгуудыг таних боломжтой болох бөгөөд тун удахгүй энэ технологийг нэвтрүүлэх болсноо мэдэгдэхэд таатай байна’’ гэв.

         Цаашид энэхүү төслийг хөгжүүлэх тал дээр хамтран ажиллах бөгөөд гар утсанд суурилсан аппликейшныг иргэдэд ямар хэлбэрээр нэвтрүүлэх, барилга байгууламжтай холбоотой асуудлууд дээр ямар дэвшил авчрах тухай НЗДТГ-аас иргэдэд албан ёсоор тун удахгүй танилцуулах юм байна.