Төв Азид байрлах усан гарцгүй улс бол Монгол. Сүүлийн жилүүдэд, Монгол улс уул уурхайн нөөц баялагаа эрчимтэй хөгжүүлэн эдийн засгийн хөгжлөөрөө дэлхийн хамгийн хурдацтай хөгжиж буй орнуудын нэг болж байгаа билээ. Монгол улсын Засгийн газар шинэ хороолол байгуулж ард иргэдээ орон сууцаар ханган, тэдний амьдралын түвшинг сайжруулах тал дээр голлон ажиллаж байна.

Эрэл группын зүгээс барилгын салбарт хийж буй энэхүү томоохон хөрөнгө оруулалтын үр дүнд Улаанбаатар хотод шинэхэн орон сууцны хороололууд тун удахгүй сүндэрлэн босох болно.

Эрэл групп нь Монгол улсад өргөн цар хүрээтэй бизнесийн үйл ажиллагаагаа явуулдаг ба барилгын материалын үйлдвэрлэл, барилгын тоног төхөөрөмжийн нийлүүлэлт, үл хөдлөх хөрөнгийн хөгжүүлэлт болон санхүүгийн үйлчилгээний салбарт голчлон бизнес эрхэлдэг юм. Угсармал хавтангийн үйлдвэрийн тоног төхөөрөмж үйлдвэрлэдэг дэлхийд тэргүүлэгч германы "Эбавэ Анлажентекник ГэЭмБэХа" компанитай саяхан гэрээ байгуулж бүрэн автомат тоног төхөөрөмжүүд худалдан авахаар болсон байна. Энэхүү үйлдвэр нь хучилтын хавтан, цул хана, сэндвичэн хавтан, дам нуруу болон багана зэргийг үйлдвэрлэх хүчин чадалтай. Энэхүү шинэ үйлдвэр нь хамгийн сүүлийн үеийн "Германд үйлдвэрлэв" технологийг ашиглаж буй дэлхийн хамгийн том үйлдвэрүүдийн нэг болох юм.

Барилгын энгийн аргуудтай харьцуулвал бэлэн угсармал хавтанг ашиглахын давуу талууд нь тодорхой байдаг. Урьдчилан бэлдсэн бүх төрлийн бетон эдлэл, бүтээгдэхүүнүүдийг хэрэглэснээр маш богино хугацаанд барих, удаан эдэлгээ, өндөр чанар, хэлбэр дүрс, хэмжээ, загварын уян хатан байдал, хямд өртөгтэй суурилуулалт болон газар хөдлөлтийг тэсвэрлэх өндөр чадвартай юм.

Угсармал хавтан үйлдвэрлэх энэхүү шинэ үйлдвэр нь арматур тор гагнах автомат төхөөрөмжөөр тоноглогдсон карусель систем, хучилтын хавтан үйлдвэрлэх зориулалттай бетон цутгах 6 тавцан, дотор хана, шат болон бусад бетон эдлэлийг үйлдвэрлэхэд зориулагдсан олон төрлийн хэвний систем зэргээс бүрдсэн. Шинээр суурилуулах зуурмагийн узель болон шанагатай конвэйрын системийн тусламжтайгаар бетонон эдлэлүүд нь зуурмагаа авах юм. Барилгын хийц загвараас шалтгаалан бетон бутлах машиныг ашиглан бетонон хавтан үйлдвэрлэх боломжтой.

ЭБАВЭ компани нь 50 гаруй жилийн туршид угсармал бетон хавтан үйлдвэрлэх зориулалттай тоног төхөөрөмжүүд үйлдвэрлэж, суурилуулах ажлыг хийж гүйцэтгэж байгаа. Тус компани нь Прогресс Групп-д харьялагддаг бөгөөд механик инженерийн чиглэлээр мэргэжлийн түвшинд үйл ажиллагаа явуулдаг дөрвөн компанийнх нь нэг юм. Энэхүү цогц шийдэл нь тухайн Группыг бетон хавтан үйлдвэрлэх зориулалттай тоног төхөөрөмжийн үйлдвэрлэлээр дэлхийд тэргүүлэгч болгож байгаа төдийгүй олон жижиг нийлүүлэгчтэй харьцахын оронд нэг том нийлүүлэгчээс цогц үйлчилгээ авах боломжийг үйлчлүүлэгч нарт олгож байгаа юм. Энэ нь үйлчлүүлэгчийн ажлыг хялбарчилж, цаг хугацаа хэмнэж байгаагаас гадна тэдний төслийн төлөвлөлт, тоног төхөөрөмжийн суурилуулалт болон үйлдвэрийг ашиглалтанд оруулах хугацааг жигд хурдтайгаар явуулахад дөхөм болдог байна. Үйлдвэр бүхэлдээ гүйцэтгэлийн нэгдсэн систем болох "Эбос" программ дээр үйлдвэрлэлээ явуулдаг бөгөөд энэ программ нь хавтан үйлдвэрлэх бүхий л үйлдлийг гүйцэтгэдэг төдийгүй 3 хэмжээст зураг, үйлдвэрлэлийн бүтээмж, хяналтын шинжилгээ, дүгнэлт зэрэг олон гайхалтай үйлдлүүдийг хийдэг байна.

Эрэл БҮК-1 гэх шинэ угсармал бетон хавтангийн үйлдвэр нь Улаанбаатар хотыг дахин төлөвлөх төсөлд шаардлагатай угсармал бетон эдлэлүүдийн гол нийлүүлэгч нь болж Монгол Улсын хөгжилд хувь нэмрээ оруулахаар зорьж байна. Улаанбаатар хотыг дахин төлөвлөх төслийн зорилго нь 200,000 айл өрхийн орон сууцыг барьж байгуулах, мөн сургууль, эмнэлэг, албан газар, жижиглэнгийн худалдааны төв, цэцэрлэгт хүрээлэн, чийрэгжүүлэх төв зэргийг барьж байгуулахаас гадна дүүргүүдийн халаалт, ус, цахилгаан, ус зайлуулах шугам сүлжээ болон бусад ард иргэдэд зориулсан хотын дэд бүтцийн асуудлуудыг шийдвэрлэхэд оршино. Өнөөгийн байдлаар хотын нийт хүн амын 60 гаруй хувь нь гэр хороололд буюу дэд бүтцэд холбогдоогүй газар амьдран суурьшиж байна.

Төслийн санхүүжилт Монгол улсын Хөгжлийн банкнаас хийгдэх бөгөөд уг банкыг эзэмшигч Монгол улсын төр энэхүү үйлдвэрийг барих ажилд ихээхэн дэмжлэг үзүүлж байгаа билээ. Герман Улсын банк болон Германы засгийн газрын баталгаат агентлаг "Хэрмэс"-тэй хамтран ажиллахаар бэлтгэж байна. Улмаар Эрэл Группийн Германы ЭБАВЭ компанитай хамтран ажиллаж буй энэхүү барилгын төсөл нь Монгол Улсын эдийн засгийн хөгжилд төдийгүй Улаанбаатар хотын хүн амын хэтийн төлөв, тэдний амьдралын түвшинг сайжруулахад хийгдэж буй томоохон хөрөнгө оруулалт юм.