Барилгын салбарын шинэчлэл, тэр дундаа тусгай зөвшөөрлийн талаарх санал шүүмжлэл барилгын салбарт ажиллагсдаас гарсаар байдаг. Нэг хэсэг нь төрийн байгууллага тусгай зөвшөөрөл олгох ажлыг дангаар зохион байгуулах  нь хүнд суртал, авилгалыг өөгшүүлж байна гэж үзэж байгаа бол нөгөө хэсэг нь өнөөгийн мэргэжлийн төрийн бус байгууллагууд энэхүү чиг үүргийг гүйцэтгэх чадваргүй гэж мэдэгдсэн. Тэгвэл маргааны гол бай болоод байгаа тусгай зөвшөөрөл, барилгын зураг төсөлд магадлал хийх ажлын талаар Монгол улсын Ерөнхийлөгч болон салбар эрхэлсэн яамны сайд, бусад удирдах ажилтан, салбарын мэргэжилтнүүд юу гэж ярьсныг тоймлон хүргэж байна.

Монгол улсын Ерөнхийлөгч Ц.Элбэгдорж:

  -  “Монголын төрийг лиценз, тусгай зөвшөөрлөөс салгах хэрэгтэй. Зарим ажлыг гэрээгээр шилжүүлж болно. Төр шаардлагагүй ажил, лиценз зөвшөөрөл, ашиг сонирхол, авлига, хахууль хөөцөлдсөн буруу ажил хийж байвал үүнийг мэргэжлийн холбоод, иргэний нийгэм, иргэд рүү шилжүүлж болно. Бизнес болгож болно. Тэгвэл төрийн хэмжээ багасна. Барилгын зургийн зөвшөөрлийг энд нэг хэлтэс юм уу, Барилгын яам олгодогийг болиулаад барилгын зурагт дүн шинжилгээ хийдэг, хариуцлагаа хүлээсэн мэргэжлийн холбоо нь зөвшөөрөл өгдөг байя. Харин төр хянадаг байх ёстой. Хууль зөрчсөн байвал төр шийднэ. Гэтэл зөвшөөрөл өгдөг бизнесийг нь төр авчихаад байна. Үүнээс болж Монголын төр маш их томорсон. Хөрөнгө оруулалт, цэцэрлэг, сургууль, иргэдийн нийгмийн асуудлыг шийддэг төсөв нэмэгддэг, төрийн захиргааны шинжтэй бусад төсвийг хэдэн жилээр царцаах хэрэгтэй. Ингэвэл манай төрийн байдал байрандаа очно. Үүнийг хийхэд Улаанбаатар хот, Улаанбаатар хотын удирдлага манлайлж, энэ санаачлагыг дэмжиж ажиллаарай. Хүрсэн амжилтаа улам баталгаажуулж, цаашдаа улам сайн ажиллаарай. Ингэж итгэж байгаа шүү”

Барилга хот байгуулалтын сайд Ц.Баярсайхан:

  -        “Барилгын салбарт 5 төрлийн тусгай зөвшөөрөл байдаг. Төрийн байгууллагын олгодог байсан зарим тусгай зөвшөөрлийг төрийн бус байгууллагууд олгох зарчим руу шилжинэ.  Ойрын үед мөрдөгдөж байгаа хуулийнхаа хүрээнд тусгай зөвшөөрлийн нөхцөлүүдийг хөнгөвчлөх бодлого барьж байна. Ялангуяа зөвлөх инженерүүдийн тоо, ажилласан жилийн хязгаарлалт гэх мэт суурь нөхцөлүүдийг бууруулахаас гадна тусгай зөвшөөрөл авахад шаардлагатай бичиг баримтын тоог цөөлөх гэхчилэн олон асуудал яригдаж байна. Цаашдаа тусгай зөвшөөрлийг онлайн хэлбэрээр олгодог болно. Зарим тусгай зөвшөөрлийг бүртгэлийн системд шилжүүлэх зорилт тавьж байгаа. Энэ бүх асуудлыг “Барилгын тухай” хуулийн шинэчилсэн найруулгад тусгах болно.”

Барилга, хот байгуулалтын яамны ТНБДарга Р.Эрдэнэбүрэн:

-        “Өнөөдөр тусгай зөвшөөрлийг шилжүүлье гэхээр мэргэжлийн холбоодын чадавхи сул байгаа учраас тэд өөрсдийгөө хөгжүүлэх, нэгдэж нийлэх шаардлагатай байна. Одоо шууд өгөх гэж үзсэн ч хоорондоо бие биенээ муулсан, барьцсан хүмүүс байгаа болохоор цаашид өрсөлдөөн бий болгож, аль чадвартайд нь шилжүүлэх байх.”

Барилгын Зураг төсөл зохиогчдын холбооны тэргүүн Г. Мягмар:

-        “Шинэчлэн найруулж байгаа барилгын тухай хуулийн төсөлд тусгай зөвшөөрлийн талаар тусгасан ч маш бүдэг байгаа. Барилга угсралтын үйл ажиллагаанд гарсан зөрчлийг арилгуулах, хяналт тавих тал дээр Мэргэжлийн Хяналтын Газраас өөр анхаарал хандуулдаг байгууллага байдаггүй. Тиймээс зураг төсөл зохиогчдын үүрэг хариуцлагыг өндөржүүлэх замаар энэ асуудалд явцын хяналт тавих, тухай бүрт холбогдох газруудтай хамтарч зөрчлийг арилгуулах эрхийг нь  олгох хэрэгтэй.”

Сэтгүүлч Б.Цолмонтуяа