Америкийн Айдохо мужийн Жулиатте нэртэй газарт нутгийн нарийн замын төгсгөлд усан үзмийн талбайн ойролцоо голын дэргэд нэгэн сайхан байшин бий. Байшингийн эзэд байгаль орчинд ээлтэй, цахилгаанд хэмнэлттэй байшинг илүүд үзсэн бөгөөд голын эргийн ойролцоох усан үзмийн талбайг сэргээх хүсэлтэд тохируулан Пол Ф Хирзел архитектурыг гаргажээ.

    Байшинг хоёр бүтэцтэйгээр зохион байгуулсан бөгөөд гол хэсгээс гадна шинээр сэргээсэн усан үзмийн талбайгаас хураасан ургацаар хийсэн дарсыг шимэн цагийг сайхан өнгөрөөх зориулалт бүхий тусгайлан тохижуулсан өөр хэсэгтэй юм. Байшингийн гол хэсгийг нь 24 метр урт гүүрэн хүрээтэй холбосон бөгөөд голын урсгал дээгүүр тус бүр 9.7, 4.8 метр урттай сунасан холбоосыг мөн хийжээ.

    Хоёр барилгын хүрээлсэн ган төмөр бэхэлгээтэй ил тавцан дээр дотны хүмүүс, зочидтойгоо цагийг сайхан өнгөрүүлж, орчноо тольдох боломжтой. Голын дээгүүр өнгийсөн тавцангийн нөгөө талаар голын эрэг уруу буух шаттай.

     Энэхүү тавцангийн нөгөө төгсгөлд хоёр талаар нь улиас мод, бяцхан сөөгийн дундуур үргэлжлэх явган хүний зам зассан агаад автомашины зогсоол хүртэл үргэлжилнэ.

     Гол барилгыг гурван жигүүртэй байхаар төлөвлөжээ. Нэг хэсэг нь гэрийн эздэд, нэг хэсэг нь зочдод, харин нөгөө хэсэг нь галын өрөө, угаалгын өрөө, амралтын өрөөтэй. Жигүүр тус бүр нь тусгаарлагдсан ч байшингийн эзэд өөрсдийн хүссэнээр сэрүүн болон дулаан байлгах тохиргоог хийх боломжтой бөгөөд цельсийн 43 градуст хүргэж болно. Энэхүү гурван жигүүрийг “Гүүрэн дээрх гурван хөргөгч” гэж нэрлэдэг бөгөөд гол барилга нь Потлатч голынхоо цутгалангийн дээд талд далайн түвшнөөс дээш 275 метрт оршдог ажээ.

    Байшингийн гурван жигүүр нь шилэн ханатай учир үзэсгэлэнт улиас моддыг тольдох боломжтой. Түүнчлэн ханануудыг гагнаж биш метал бэлдэцүүдийг холбон боож, шалыг цэвэр модоор хийсэн. Холбож угсарсан байшин галын аюулыг багасгах ач холбогдолтойгоос гадна шаардлага гарвал задлах, эргүүлээд угсрахад тийм ч хүндрэл учрахгүй.

    Тавцангийн дээд хэсэг хүртэл үргэлжлэх дугуйрсан шат сүүдрэвч болох хэдий ч зарим гишгүүрийг нүхэлснээр нарны гэрэл нэвтрэх боломжтой болгожээ.

     Гараараа тулж барих хөндөл модгүй энэхүү хэсэг нь амрах, орчноо тольдон таашаал авах чөлөөтэй орчныг бүрдүүлж байгаа юм.

Байшингийн дотоод хэсгийг нарс модоор хийж, хана туургыг наамал банзаар доторлосон байна.

    Галын өрөөний шүүгээнүүдийг мөн л нарс модоор хийсэн ба дээд талын шүүгээнүүд задгай тавиуруудтай. Харин тавиурын доод хэсэгт цонхыг суурилуулжээ. Галын өрөө уужим зайтай, хоолны ширээг байрлуулан тэр орчныг бүхэлд нь гэрэлтүүлэх бөмбөр мэт чийдэнг дээр нь зүүсэн байна. Угаалгын өрөө нь шалнаасаа тааз хүртэл цонхтой учир усанд орж буй хүн орчноо бүрэн харах бололцоотой.

    Хоёр дахь жижгэвтэр барилга Потлатч голын урсгалын дээд талд 304 метрт байрлах бөгөөд “дарс таашаагчид”-д цагаа зугаатай өнгөрүүлэхэд зориулсан гэж болно.

     Түүний 12 метр орчим гүүрэн хүрээ голын яг урсгал дээр байгаа. Эндээс Steelheadбуюу Тул загасны түрсээ шахаж буй сэтгэл хөдөлгөсөн агшинг ч харж болдог юм байна.