Даваа гариг бүр зохион байгуулдаг “Бүтээн байгуулалтын цаг” уулзалт өчигдөр Баянголын аманд баригдаж буй “Буман-Өлзий” орон сууцны шинэ хороололд боллоо. Уулзалтад Ерөнхий сайд Н.Алтанхуяг, Барилга, хот байгуулалтын Төрийн нарийн бичгийн дарга Т.Эрдэнэбүрэн, Нийслэлийн Засаг даргын орлогч Д.Гантөмөр болон албаны хүмүүс оролцлоо.

          Баянголын ам, Нисэх, Яармаг орчимд орон сууцны хорооллууд төдийгүй сургууль, цэцэрлэг, эмнэлэг зэрэг бүтээн байгуулалтын олон ажлыг эхлүүлсэн ч дэд бүтэц байхгүйгээс барилгын ажлууд зогсоод байсан юм. Ийм хүндрэл өнөөдрөөс алга болж, дээрх газруудад орон сууцны хорооллууд, хувийн хаус баригдахад саадгүй боллоо гэж Ерөнхий сайд Н.Алтанхуяг мэдэгдлээ.
       Барилга, хот байгуулалтын яамны “Дэд бүтэц” төслөөр Улаанбаатарт баригдах шинээр төлөвлөгдсөн хорооллуудын цахилгаан, цэвэр, бохир ус, дулаан хангамж, ариутгах татуургын инженерийн дэд бүтцийн барилга байгууламж, шугам сүлжээний ажлууд хийгдэж дууссанаар энэ газруудад барилга байшин сүндэрлэх боломж бүрдлээ гэдгийг “Бүтээн байгуулалтын цаг”-ийн үеэр зарласан. Эдгээр газарт дэд бүтэц татахад Чингис бондын хөрөнгөөс 40 тэрбум төгрөг зарцуулжээ.

           Зөвхөн Баянголын амны 410 га газар иж бүрэн дэд бүтцэд холбогдсоноор 20 мянга орчим өрх амьдрах хороолол босох юм. “Бүтээн байгуулалтын цаг” болсон Буман-Өлзий ХХК л гэхэд 20 га газарт 5000  айлын орон сууц барихаар төлөвлөж эхний 500 айлын орон сууцны барилгыг дуусган ашиглалтад өгөхөд бэлэн болгосон байна.