Нийслэлийн ИТХ-аас Гэр хорооллын дахин төлөвлөлтийг 12 байршилд хэрэгжүүлэх шийдвэр гаргаснаар Гэр хорооллын дахин төлөвлөлтийн үйл ажиллагааны журмын дагуу төсөл хэрэгжүүлэх хүсэлтээ илэрхийлж саналаа өгсөн хувийн хэвшлийн байгууллагуудыг үе шаттайгаар шалгаруулснаар байршил тус бүрт төсөл хэрэгжүүлэх компаниуд тодорсны нэг нь “Грандлайн” компани юм.

      Тэгвэл өнөөдөр “Гранд лайн” компани, Туркийн “216 Yapi” компанитай хамтран ажиллах гэрээнд гарын үсэг зурлаа. “Гранд лайн” компани нь Баянзүрх дүүргийн 12 хорооны иргэд, оршин суугчидтай харилцан тохиролцсоны үндсэн дээр “Түмэн амгалан” хэмээх цогцолбор хорооллын шавийг тавьж нээлтээ хийсэн юм.

      Хамтын ажиллагааны гэрээнд гарын үсэг зурах ёслолд БНТУ-аас Монгол Улсад суугаа онц бөгөөд бүрэн эрхт элчин сайд Мурат Карагоз болон “216 YAPI” ХХК-ийн удирдах зөвлөлийн тэргүүн Билэнт Дүндари, “Түмэн Амгалан” төслийн Монголын талын төлөөлөгч болох “Гранд лайн” ХХК-ийн захирал Б.Чулуудай, Гэр хорооллын хөгжлийн газрын дарга Ш.Ганхуяг нар болон бусад албаны хүмүүс, дүүргийн иргэд оролцсон байна.

      “Түмэн амгалан” хотхон нь 940 хүүхдийн хүчин чадалтай сургууль, тус бүр 140 хүүхдийн хүчин чадал бүхий 2 цэцэрлэг,  зам талбай дагуух болон хорооллын дундах ногоон байгууламж, цэцэрлэгт хүрээлэн, газар доорхи  2300 автомашины дулаан зогсоол, хорооны байр, өрхийн эмнэлэг, цагдаагийн тасаг гээд нийт талбайн 48 хувь нь ногоон байгууламж бүхий хүн амьдрах нийгмийн хэрэгцээг цогц байдлаар шийдсэн цогцолбор хороолол сүндэрлэх юм.