Батлан хамгаалахын яамнаас салбартаа хийж буй шинэчлэлийн бодлогын нэг нь хугацаат цэргийн алба хаагчдыг мэргэжилтэй, ажилтай, орлоготой болгож, эх орноо хамгаалах үндсэн үүргийнхээ зэрэгцээ улс орныхоо бүтээн байгуулалтад түлхүү оролцох нөхцөл боломжийг бүрдүүлэх явдал юм.

           Энэ оны гуравдугаар сард шинэчлэлийн Засгийн газраас батласан “Монгол цэрэг бүтээн байгуулалтад” хөтөлбөр амжилттай хэрэгжин, улс орон даяар цэрэг дайчдын хүч хөдөлмөрөөр олон сайхан барилга байшин сүндэрлэж, зам гүүр баригдсаар байна. Хугацаат цэргийн алба хаагч, ахлагчаар бэлтгэгдэж байгаа сонсогчид  алба хаах хугацаандаа тусгай мэргэжлийн сургалтанд хамрагдаж, мэргэжлийн зэрэг дэвээ тогтоолгон үнэмлэх гардаж байгаа аж.

         “Монгол цэрэг бүтээн байгуулалтад” хөтөлбөрийн хүрээнд Мэргэжлийн ахлагч бэлтгэх сургалтын төв болон Зэвсэгт хүчний 013, 017 дугаар ангиудын 150 цэргийн алба хаагчдад барилгын мэргэжил олгох сургалт сар гаруйн өмнө эхэлжээ.Хөдөлмөрийн яамны ХҮТ-ийн Хөдөлмөр эрхлэлтийг дэмжих сангийн санхүүжилтээр БХЯ-ны БХАҮН, ЗХЖШ болон нэр бүхий дөрвөн МСҮТөвийн хамтран хэрэгжүүлж буй Цэргийн алба хаагчдад энгийн мэргэжил олгох сургалт нь 45 хоногийн хугацаанд үргэлжлэх бөгөөд хамрагдсан цэргүүд онолын сургалтаа дуусгаад, бүгд дадлагын ажилдаа гарсан байна. “Мила”, “МонТа”, Монголын барилгачдын холбооны МСҮТөвүүдээс гадна Техник технологийн дээд сургууль дээр цэргүүд өрлөг өрөх, гагнуур хийх, мужаан болж, ор, сандал урлах, засал чимэглэл хийн орчноо өөд татах, сантехникийн монтаж, холболт хийх зэргээр сурч мэдсэн зүйлээ амьдрал дээр буулган дадлагажиж байгаа аж.

         Цэргийн алба хаагчид энэ хугацаанд бетон арматурч, өрлөг угсрагч, засал чимэглэлч, сантехникч, гануурчин, мужаан гэсэн зургаан төрлийн барилгын бага мэргэжил эзэмшиж, шалгалт өгөөд, мэргэжлийн I-III зэргийн үнэмлэхтэй төгсөх юм байна. МСҮТөвийнхөн мэргэжлийн онолын мэдлэг олгохоос гадна амьдрах ухаанд сургах, мэргэжилдээ эзэн болох, хөдөлмөрийн аюулгүй байдлын талаар ч сургалтынхаа хөтөлбөрт оруулан заажээ.