Асуудал дагуулсан барилгуудын жагсаалт үргэлжилсээр байна. Бүтээн байгуулалт эрчимтэй өрнөж орон сууц, олон улсын жишигт нийцсэн стандарттай үйлчилгээний барилга байгууламж баригдаж байгаа нь сайшаалтай ч чанарын доголдолтой болоод бусдын эрх ашигт халдаж, зөвшөөрөлгүй барилгын ажил эхлүүлэх гээд олон асуудал барилгын салбарт байсаар л байна. Асуудал дагуулсан барилгуудтай танилцая. 

       Өвлийн идэр ёс эхлээгүй байхад цонх нь цантаж, мөсдөөд, зай завсраар нь хүйтэн салхи үлээж, халаалт нь доголдож оршин суугчид нь зутруухан амьдарч байгаа орон сууцнуудын жагсаалтыг Баянзүрх дүүргийн 4-р хороо, Хилчний гудамж, 27, 27^А байр нэгээр нэмлээ. Уг орон сууцыг “Монгол угсаа” гэх компани барьж ашиглалтанд оруулжээ.

Анх захиалга авч эхлэхдээ 2012 оны 10 сард ашиглалтанд орно, Герман, Солонгосын хамгийн чанартай материал бүтээгдэхүүнийг ашигласан гэж иргэдтэй гэрээ байгуулсан боловч Мэргэжлийн хяналт хүлээж аваагүй гэх шалтгаанаар 2013 оны 5 сарын 11- ээс эхлэн оршин суугчидаа оруулж эхлэсэн гэнэ.

Ашиглалтанд ороод жил болоогүй ч халаалт нь байнга доголдож, цонх нь цантаж, хөлдсөн мөс нь өдрийн цагаар хайлж, ус гоождог учир байнга арчиж, цэвэрлэдэг. Мөн байнгын чийгтэй байдгаас орон сууцны булан тохойгоос нь эхлэн мөөгөнцөртөж, паркетан шал нь хөндийрөн хөвсийж эхлэжээ. Захиалга авч байхдаа 1м² талбайгаа 1,450,000 төгрөгөөр авч байсан “чанаргүй хулхи” байрны 1м² талбайн үнэ одоо 2,000,000 сая төгрөг болж өссөн байна.

Оршин суугчид халаалт, цонх гээд өөрсдөдөө тулгарсан асуудлуудаа шийдвэрлүүлэхээр “Монгол угсаа” компанийн удирдлагуудад хэлэхэд “Эд нараас төлбөрөө авчихсан учраас одоо хамаагүй гэсэн” байдалтай харьцаж, тоодоггүй байна. Тэр ч бүү хэл үг хэлээр доромжлон “Хэрвээ сэтгэл дундуур байвал гарч болно. Харин байрыг чинь зарсаны дараа мөнгийг чинь өгнө” гэсэн басамжлан доромжилсон хариултыг өгдөг гэнэ. Энэ орон сууцанд амьдардаг хүн болгон “Монгол угсаа” компанид гомдолтой явж байна.

         Улаанбаатар хотын Сүхбаатар дүүргийн нэгдүгээр хороо Олимпийн гудамжинд байрлах Хуримын ордны урд Монгол улсын анхны ерөнхийлөгч П.Очирбатын амины орон сууц байсан газародоо MCS группын мэдэлд очиж, үйлчилгээний зориулттай гэх 25 давхар барилгын ажлаа эхлүүлсэн.

Гэвч уг барилгын ажлаас болж хоёрхон метрийн зайд хойд талд нь орших Олимпийн гудамжны 9-р байранд үүссэн гэх цууралт өдрөөс өдөрт нэмэгдсээр байна. Харин MCS группийнхэн барилгын ажлаас болж 9-р байранд цууралт үүсээгүй өмнө нь цууралт үүссэн гэх хариултыг өгдөг ч иргэдөмнө нь зүгээр байсан “МСS”-ийн барилгын ажлаас болж цуурсан гэдгийгбаталсаар байгаа юм.

Монголын бизнесийн салбарт “толгой цохих” компани, иргэд хоёрын тэмцэл өнөөдөр ч үргэлжилсээр байна. Хөрөнгө, мөнгөтэй компани барилга байгууламж барьж болно, гэвч тэдэнд бусдын өмч хөрөнгөнд хохирол учруулах түүнийгээ үл тоох эрх байхгүй баймаар...

Бэлтгэсэн: Г.Одгэрэл