Нийслэл хотод энэ онд хэрэгжүүлэх эдийн засаг, нийгмийн зорилтыг  НИТХ-аас батлаад байгаа билээ. Энэ зорилтын хүрээнд 23 чиглэл, 123 заалт бүхий 338 үйл ажиллагааг хэрэгжүүлэхээр тусгажээ.

         Уг  зорилтын Агаар, хөрсний бохирдлыг бууруулах чиглэлээр хот тохижилтын цэвэрлэгээ, арчилгааны тусгай зориулалтын машин, механизмыг шинэчлэх ажлыг үргэлжлүүлэх, Нарангийн энгэрийн хог ангилах ялгах үйлдвэрийг өргөтгөн, үйл ажиллагааг нь сайжруулах, хотын хог хаягдлын менежментийг сайжруулах хөтөлбөрийг хэрэгжүүлэх зэрэг хэд хэдэн ажлыг гүйцэтгэхээр заасан байна. Түүнчлэн нийслэлийн 10-аас дээш га талбайд усан оргилуур бүхий бичил цэцэрлэг байгуулах, Туул, Сэлбэ, Дунд голын дагуу амралт зугаалгын бүс байгуулж, тохижуулах ажлыг эхлүүлэх, хоёроос доошгүй хог боловсруулах үйлдвэр байгуулахаар төлөвлөжээ.

       Хог боловсруулах үйлдвэр байгуулах ажил нь хувийн хэвшлийн байгууллагуудтай хамтран төсөл сонгон шалгаруулах зарчмаарявагдах бөгөөд  МУ-ын Засгийн газрын шийдвэрийн дагуу арьс шир, ноос ноолуурын анхан шатны боловсруулах үйлдвэрүүдийг хотоос нүүлгэн шилжүүлэх ажлыг ҮХАА-н яамтай хамтран эхлүүлж, агаар, хөрс, орчны бохирдлыг бууруулах зорилгоор бохирдол үүсгэдэг байгууллагууд, төвлөрсөн захуудыг хотоос гаргах асуудлыг судалж, шаардлагатай бол НИТХ-аар шийдвэрлүүлэх, Улаанбаатар хотод үйл ажиллагаа явуулж буй барилгын материал, авто машины зах, хүнс, хөнгөн үйлдвэрүүдийн байршилд дахин төлөвлөлт хийхээр тусгасан байна.

       Мөн хотын ногоон байгууламжийг нэмэгдүүлэх чиглэлээр хашаандаа мод сөөг тарьсан айл өрхүүдийг урамшуулдаг тогтолцоог бий болгох, Засгийн газрын “Ногоон хэрэм” үндэсний хөтөлбөрийн хүрээнд 10 га газарт ногоон зурвас байгуулах, ТББ, иргэд, аж ахуйн нэгжтэй хамтран ажиллаж хотын ногоон бүсийг 20 хувь хүртэл нэмэгдүүлж “Хотын эко цагдаа” ажиллуулахаар болжээ.

        Харин усны эх үүсвэрийг хамгаалах, нөөцийг нэмэгдүүлэх чиглэлээр Туул голын дагуу ашигт малтмал хайх, олборлох тусгай зөвшөөрөлтэй аж ахуйн нэгжүүдийн үйл ажиллагаанд хяналт тавьж, нөхөн сэргээлт хийлгэх, уулын дайргыг хууль бусаар ашиглахыг таслан зогсоох, УБ хотын төв цэвэрлэх байгууламжид 2-р тунгаагуур хоёр ширхэг, био цөөрөм барих, Налайх дүүргийн 5-р хорооонд бага оврын цэвэрлэх байгууламж барих зэрэг ажлуудыг хийхээр төлөвлөөд байна.