Шинэ орон сууц худалдан авахад чанар нь ямар бол гэж толгой өвтгөдөг байсан бол одоо талбай нь бүрэн эсэхэд бас санаа зовних шаардлагатай болжээ. Худалдан авсан орон сууцных нь талбай дутуу байгаа тухай гомдол ШӨХТГ-т тасралтгүй ирсээр байгааг албаныхан мэдээлсэн. Иргэдээс ирүүлсэн гомдлын дагууШӨХТГ, БХБЯ, Стандартчилал Хэмжил Зүйн Газар хамтран шалгалт хийсний дүнд 40 гаруй компаний барьсан орон сууцны м² дутуу байгааг илрүүлжээ.

          Иргэд зөрчил гаргасан компаниудын нэрийг нийтэд зарлаж, хуулийн дагуу арга хэмжээ авахыг шаардсан ч ШӨХТГ-аас тус компаниудад зөрчлөө арилгаж, иргэдийн хохирлыг барагдуулах шаардлага тавьсан. 1 дүгээр сарын 2-ны байдлаар орон сууцны талбайн хэмжээ дутаасан компаниудын тоо  40 байсан бол одоогийнбайдлаар 47 болж нэмэгджээ.

         Эдгээр компаниудын иргэдэд учруулсан нийт хохирлын хэмжээ 1,5 тэрбумд хүрсэн. Одоогоор 150 сая төгрөгийн хохирлыг бэлэн мөнгөөр барагдуулсан бол ихэнхи компанитодорхой хугацааны дараа барагдуулахаар иргэдтэй тохиролцоод байгаааж. 1,5 тэрбум төгрөгийн хохирлын гуравны нэгийг дангаараа эзэлж байсан Khansvill хороолол энэ сарын 15-ны дотор 400 сая төгрөгийг оршин суугчиддаа өгөхөөр тохиролцсон бол “Хилчин” хотхон, “Корей таун” хотхоныг захиалан бариулсан компаниуд оршин суугчдынхаа хохирлыг барагдуулжээ.  Харин ШӨХТГ-аас тавьсан шаардлагыг удаа дараа биелүүлэхгүй байгаа “Тайгам Алтай” компанийн хувьд дараагийн шатны арга хэмжээг авахаар болсон байна.

        Шалгалтын явцад зөрчил гаргасан барилгын компаниуд орон сууц худалдах,худалдан авах гэрээн дээр мэх гарган иргэдийг төөрөгдүүлж завшдаг нь тогтоогджээ. Тиймээс ШӨХТГ-аас 2 талын эрх ашгийг тэнцүү тусгасан худалдах, худалдан авах гэрээний загварыг боловсруулж байгаа аж. Бэлэн болж буй уг гэрээг Барилга, хот байгуулалтын сайдаар батлуулсны дараа олон нийтэд мэдээлэх юм байна.