Барилгын салбарын цогц мэдээллийг түгээгч Барилга.МН сэтгүүлийн 2014 оны хамгийн эхний дугаар уншигчдын гарт хүрэхэд бэлэн боллоо. Сэтгүүл маань захиалагч, уншигчдад хэрэгцээт мэдээллийг нь түгээсээр зургаа дахь жилтэйгээ золгож байна. Сэтгүүлийн нэгдүгээр сарын дугаарт 2014 оны улс орны эдийн засаг төлөв ямар байх талаар эдийн засаг судлаачид байр сууриа илэрхийлсэн бөгөөд улсын төсөв ба тендертэй холбоотой маргаантай асуудлыг хөндлөө. Мөн барилгачиддаа зориулж өвлийн улиралд бетоны ажил гүйцэтгэх технологийг танилцуулж байна.

Ингээд сэтгүүлийн шинэ дугаарт багтсан мэдээ мэдээллийн тоймыг хүргэе.

Мэдээ мэдээлэл

Худалдаа, үйлдвэрлэл өндөр хөгжсөн Европын орнуудад барилгын материалын худалдаа ямар байдаг талаарх сонирхолтой мэдээллийг уншаарай.

Гэр хорооллыг дахин төлөвлөх ажил өнгөрөгч оноос хэрэгжиж эхлээд байгаа билээ. Нийтдээ гэр хорооллын 20 байршилд дахин төлөвлөлт хийж, орон сууцжуулах ажил эхлээд байгаа бөгөөд сүүлд батлагдсан 8 байршлын дахин төлөвлөлтийн дэлгэрэнгүй төлөвлөгөөг сэтгүүлийн шинэ дугаараас үзэх боломжтой.

Асуудал хөндсөн сэдэв

Энэ онд улс орны эдийн засгийн төлөв ямар байх, төсвийн үргүй зардал буурсан эсэх, улсын төсвийн санхүүжилтээр бүтээн байгуулалтын ямар ажлууд хийгдэх талаар, мөн  тендер нэрийн дор явагддаг будилааныг цэгцлэх үү зэрэг асуудлыг энэ буландаа хөндөж бичлээ.

Дуулгах мэдээ

Динамик хаус буюу жилийн дөрвөн улиралд ашиглах боломжтой “Өвлөөс зун”  гайхалтай хувийн орон сууцны танилцуулгыг бэлтгэлээ. Энэхүү байшинг цаг уурын бүх нөхцөлд тохируулан хувиргах боломжтой.

Мэргэжлийн зөвлөмж

Энэхүү  булангаараа байгальд ээлтэй нэгэн зөвлөмжийг бэлтгэн хүргэж байна. Дэлхий нийтээрээ цэвэр усны нөөц багасч буй энэ үед хаягдал улсыг дахин боловсруулж, ашиглах технологийг улс орон бүхэн хэрэгжүүлж байгаа билээ. Иймээс хаягдал усны санг доторлох зөвлөмжийг бэлтгэлээ.

Идэвхитэн бичигч

Барилга.МН сэтгүүлийн Идэвхитэн бичигч буланд барилгын салбартай холбогдсон үйл явдал, төр засгийн шийдвэр, техник технологи, шийдвэрлэх асуудлын талаар уншигч, захиалагч, салбарын мэргэжилтнүүд өөрийн байр суурийг илэрхийлдэг. Тус дугаарт нэгэн уншигчаас ирүүлсэн “Хулдаасан барилга” нийтлэлийг хүргэж байна.

Нэг сэдвээр

2014 оны улсын эдийн засгийн төлвийг судлаач, мэргэжилтнүүдээс тодруулахын зэрэгцээ энэ нь барилгын салбарт хэрхэн нөлөөлөх тухай дэлгэрэнгүй ярилцлагуудыг эндээс уншаарай.

Үнэ ханш

Барилгын материалын үнэ ханшийн судлагаа, барилгын ажил гүйцэтгэлийн үнэлгээ, шинэ орон сууцны үнэ ханшийн дэлгэрэнгүй судалгааг хүргэж байна.